Aqmola oblysynda toı jasaǵandar jazalandy
KÓKShETAÝ. QazAqparat – Aqmola oblysynda karantın rejımin buza otyryp, kópshilik sharalar ótkizilgendigi anyqtaldy, dep habarlaıdy QazAqparat tilshisi.
Aqmola oblysy sanıtarlyq-epıdemıologııalyq baqylaý departamentiniń málimetinshe, 2021 jyldyń 6 aqpanynda Tselınograd aýdanynyń Qabanbaı batyr aýylynda monıtorıngtik top karantın rejımi buzylǵanyn anyqtady. Munda 80 adamnyń qatysýymen 70 jyldyq mereıtoı uıymdastyryldy.
Budan bólek, monıtorıngtik top Kókshetaý qalasyndaǵy «Altyn shańyraq» qonaqúı kesheninde úılený toıy ótkizilgendigin anyqtady.
«Bul keshen karantındik talaptardy elemeı, jappaı is-sharalar ótkizip turady. Ákimshilik jaýapkershilikke 4 ret tartyldy. Kókshetaý qalasynyń sanıtarlyq qyzmeti jospardan tys tekserý júrgizdi. Toı ótkizý faktisi boıynsha uıymdastyrýshy men jeke kásipker ákimshilik jaýapkershilikke tartylady», - dedi vedomstvodan.
Sonymen birge, monıtorıngtik top Kókshetaý qalasyndaǵy «Han saraıy» meıramhanasynda «Tıolaın» JShS fırmasy 200 adamnyń qatysýymen korporatıvtik is-shara ótkizgendigin anyqtady.
«Kókshetaý qalalyq sanıtarlyq-epıdemıologııalyq baqylaý basqarmasy is-sharany uıymdastyrýshy men ótkizgen mekemege qatysty Ákimshilik quqyq buzýshylyq kodeksiniń 425 baby 1 bóligi boıynsha jaýapqa tartý sharalaryn qabyldaıtyn bolady», - dep tolyqtyrdy vedomstvodan.
