Aqmola oblysynda tótenshe jaǵdaı rejimi engizile me – TJK jaýaby
NUR-SULTAN. QazAqparat – Aýa raıynyń qolaısyzdyǵyna baılanysty 3 kúnniń ishinde respýblıkalyq jáne oblystyq mańyzy bar joldar 106 ret jabyldy. Bul týraly QR Іshki ister mınıstrligi Tótenshe jaǵdaılar komıteti tóraǵasynyń mindetin atqarýshy Marat Kóldikov aıtty, dep habarlaıdy QazAqparat tilshisi.
«Aýa raıynyń qolaısyzdyǵyna baılanysty Qazaqstan aýmaǵyndaǵy ahýal kúrdeli bolyp tur. Osyǵan baılanysty búginge deıin respýblıkalyq jáne oblystyq mańyzy bar joldar 106 ret jabyldy. Eldiń 10 óńirinde 93 ret daýyl soǵatyndyǵy eskertildi», - dedi Úkimet otyrysy aıasynda BAQ ókilderine suhbat bergen Marat Kóldikov.
Onyń dereginshe, qańtardyń 24-27 kúnderi aralyǵynda qar qursaýynda qalǵan 2 myńnan astam adam qutqaryldy. Munan bólek, qarǵa batqan 2 myńnan astam tehnıka shyǵaryldy.
«Tótenshe oqıǵalardyń basym bóligi elordada, Aqmola men Qaraǵandy oblystarynda oryn aldy. Al Pavlodar, Shyǵys Qazaqstan, Batys Qazaqstan jáne Aqmola oblystarynda joldardyń jekelegen ýchaskeleri ǵana jabyldy. Osyǵan baılanysty respýblıka boıynsha eldiń 9 óńirinde 10 jedel shtab quryldy. Pavlodar oblysy men Şýche baǵytynda kólik qozǵalysynda problema týyndap tur. Tótenshe jaǵdaı rejimi Nur-Sultan qalasynda ǵana jarııalanǵan. Aqmola oblysynda tótenshe jaǵdaı rejimin engizý máselesi qarastyryp jatyr», - dedi ol.
Marat Kóldikovtiń dereginshe, keshe túni saǵat 3-te Nur-Sultan men Şýche arasyndaǵy jolda taǵy da kólikter qalyp qoıǵan. 140 tehnıka men 382 adam Aqkól qalasyna jetkizilgen.
«Qazir adamdar Mádenıet saraıy men jergilikti kolledj ǵımaratyn panalap otyr. Olarǵa demalatyn oryn, tamaq berildi. Jalpy bizdiń tarapymyzdan 1 230 maman men 665 arnaıy tehnıka jumyldyrylǵan», - dedi komıtet tóraǵasynyń mindetin atqarýshy.
