Aqmola oblysynda til onkúndiginde 1000-ǵa jýyq shara ótedi
KÓKShETAÝ. QazAqparat - Aqmola oblysynda til onkúndigi sheńberinde 1000-ǵa jýyq onlaın shara ótkiziletin bolady. Bul týraly jýrnalıstermen ótken brıfıngte oblystyq ishki saıasat basqarmasynyń basshysy Altynaı Ámirenova aıtty, dep habarlaıdy QazAqparat tilshisi.
Basqarma basshysy atap ótkendeı, tıisti qabyldanǵan qujatqa sáıkes «Qazaqstan Respýblıkasyndaǵy til saıasatyn iske asyrýdyń 2020-2025 jyldarǵa arnalǵan memlekettik baǵdarlamasyn iske asyrý jónindegi oblystyq is-sharalar jospary» bekitilgen. Osy jospar sáıkes til onkúndigi sheńberinde óńirde birqatar sharalar qolǵa alynbaqshy. Koronavırýsqa baılanysty olardyń barlyǵy onlaın formantynda ótkizý josparlanǵan.
«Aqmola oblysy boıynsha til onkúndigi aıasynda 1000-ǵa jýyq onlaın is-shara ótkiziledi, oǵan 200 myńǵa jýyq adam qatysady. Naqtyraq aıtsam, «Uly Dalanyń uly Tili» Túrkııa, Anglııa, Frantsııa, Majarstan elderiniń etnıkalyq qazaq qoǵamdyqtarynyń qatysýymen halyqaralyq onlaın konferentsııasy, «Til - halyqtyń uly baılyǵy, bala tili – bal búldirshinder» atty onlaın festıvali, Ábý Nasyr ál-Farabıdiń 1150 jyldyǵyna oraı aýdan jastary arasynda «Qaıyrymdy qala turǵyndarynyń kózqarastary jaıly traktatynan» úzindiler jatqa aıtý saıysy, Abaı Qunanbaıulynyń 175 jyldyq mereıtoıyna oraı «Abaı tili – ǵasyr úni» atty mánerlep oqý, beıne baıqaýlar saıysy jáne basqa da sharalar uıymdastyrylady» - dedi basqarma basshysy Altynaı Ámirenova.