Aqmola oblysynda tikushaqty qondyrý kezinde 3 ekıpaj múshesi zardap shekti
KÓKShETAÝ. QazAqparat - Aqmola oblysynda tikushaqty qondyrý kezinde 3 ekıpaj múshesi zardap shekti, dep habarlaıdy QazAqparat tilshisi.
Oblystyq densaýlyq saqtaý basqarmasy baspasóz qyzmetiniń málimeti boıynsha, tótenshe jaǵdaı qyrkúıektiń 22-de túnde oryn alǵan. Aqkól aýdany aýmaǵynda Mı-2 tik ushaǵyn qondyrý kezinde áýe kóligi jerge qatty qonyp, borttan órt shyqqan. Osynyń saldarynan tikushaq ishinde bolǵan ekıpaj músheleri 1969 jyly týǵan bort komandıri Aleksandr Mankov, bort mehanıgi 1956 jylǵy Gennadıı Balýev jáne taǵy bir ekıpaj múshesi 1969 jylǵy Dýman Baıbýsınov zardap shekken.
«Zardap shekkender jedel túngi saǵat 02:50 shamasynda Aqkkól aýdandyq aýrýhanasyna jetkizildi. Tikushaq ekıpajynyń komandıri Aleksandr Mankov pen Dýman Baıbýsınov jeńil-jelpi zardap shekti. Bul ekeýi dárigerler qaraǵan soń úılerine jiberildi. Al, bort mehanıgi Gennadıı Balýevtyń denesin 40-50 paıyz kúıik shalǵan. Qazirgi kezde, ol alǵashqy medıtsınalyq kómek kórsetilgen soń Astanadaǵy aýrýhanaǵa jóneltildi», - dep túsindirdi baspasóz qyzmetindegiler.
Resmı málimetterge qaraǵanda Mı-2 tikushaǵy «Tıan-Shan» áýe kompanııasyna tıesili.
Sondaı-aq, tikushaq músheleri Almaty oblysynyń turǵyndary. Aqmola oblysyndaǵy dala órtterin sóndirýge kelgen. Qazirgi kezde, tótenshe jaǵdaıdyń mán-jaıy anyqtalyp jatyr.
