Aqmola oblysynda teatr maýsymy aıaqtaldy
KÓKShETAÝ. QazAqparat - Aqmola oblysynda Shahmet Qusaıynov atyndaǵy Qazaq mýzykalyq drama teatrynda XXIV maýsym aıaqtaldy. Teatrdyń turaqty kórermenderi bar, olar birde-bir spektakldi qur jibermeıdi, dep habarlaıdy QazAqparat tilshisi oblystyq ishki saıasat basqarmasyna silteme jasap.
Vedomstvonyń málimetinshe, aldaǵy kúnderi teatrda onlaın-spektaklder ǵana jumys isteıdi. Máselen, maýsymnyń 3-inde Balalardy qorǵaý kúnine oraı «Altyn balapan» ertegisi josparlanǵan. Bul týraly tolyǵyraq aqparatty Sh.Qusaıynov atyndaǵy teatrdyń kazdramteatr.kz saıtynan bilýge bolady.
«Teatr grek tilinen aýdarǵanda «oıyn-saýyq» degendi bildiredi. Biraq bul olaı emes, qazirgi zamanǵy teatr - bul kórermenge úlken oı salady. «Qadir tańy», «Otbasylyq qupııa», «Ótirik aıtpaıtyn adam» spektaklderi qazirgi qoǵamda ózin ózi tanýǵa, qorshaǵan álemdi zertteýge jeteleıdi», - deıdi Batyrbek Tursynáli.
Kórermenniń aıtýynsha, ol Aqan seri atyndaǵy joǵary mádenıet kolledjindegi drama teatrdyń ártisi retinde bilim alýda.
«Teatr-bul rýhanı azyq jáne ol úshin úlken tájirıbe», - dep atap ótti stýdent.
Maýsym sońynda oblystyq mádenıet, arhıvter jáne qujattamalar basqarmasynyń basshysy Aıgúl Sábıtova teatrdyń úzdik qyzmetkerleriniń eńbegin atap ótti.
«Jyldyń úzdik akteri» ataǵyn Tólebulan Tóleýov aldy, «Úzdik aktrısa» atalymynda Marjan Bókeshovaǵa teń keler eshkim bolǵan joq.
