Aqmola oblysynda táýligine 500 tonna un tartatyn dıirmen iske qosylady
KÓKShETAÝ. QazAqparat - Aqmola oblysynyń Óńirlik kommýnıkatsııalar qyzmetinde ótken brıfıngte Jaqsy aýdanynyń ákimi Baýyrjan Məlǵajdarov óńirdiń áleýmettik-ekonomıkalyq damýynyń 2018 jylǵy qorytyndysy men bıylǵy jyldaǵy josparlary týraly aıtyp berdi, dep habarlaıdy QazAqparat tilshisi.
Aýdan ákiminiń aıtýynsha, 2018 jyldyń qorytyndysy boıynsha óńirde aýyl sharýashylyǵynda óndirgen jalpy ónim kólemi 31,4 mıllıard teńgeni quraǵan. Onyń ishinde, mal sharýashylyǵy 5,5 mıllıard teńge, egin sharýashylyǵy 25,7 mıllıard teńge kóleminde bolǵan. Naqty kólemi ındeksi 98 paıyz.
«Bıylǵy jyly aýdan dıqandary 613,6 tonna astyq jınady. Agrotehnıkalyq sharalardy utymdy qoldanýdyń arqasynda gektar túsimi 14,3 tsentnerden aınaldy», - deıdi aýdan ákimi.
Sonymen birge, Baýyrjan Məlǵajdarov agrarly aýdanda mal sharýashylyǵyna da zor kóńil bólinip kele jatqanyn atap ótti. Ony aýdanda mal sanynyń artqanynan baıqaýǵa bolady. Tiri salmaqtaǵy et óndirisi 3,8 myń tonnany jáne sút óndirisi 20,1 myń tonnany qurap otyr. Ónerkásip salasynda óndirilgen óniminiń kólemi 2918,1 mıllıon teńgege jetip, ótken jylmen salystyrǵanda naqty kólem ındeksi 100,4 paıyzdy qurady.
«Aýdandaǵy irgeli sharýashylyqtar «Ýrojaı» jáne «Aıbat» seriktestikteri eń iri salyq tóleýshiler. Bıylǵy jyly «Ýrojaı» seriktestiginde qýaty táýligine 500 tonna un shyǵaratyn dıirmen jáne jylyna 12 myń tonna dándi jáne burshaq daqyldaryn óńdeıtin jarma tsehy keshenderin iske qosý josparlanǵan», - dep túıindedi aýdan ákimi.
