Aqmola oblysynda «Táýelsizdik jastary» alleıasy ashyldy
Kókshetaýdaǵy «Bolashaq saraıy» aýlasynda ashylǵan jańa alleıada táýelsizdik qurdastary jáne jastar uıymdarynyń kóshbasshylary Táýelsizdiktiń 30 jyldyǵyna arnap, 30 aǵash otyrǵyzdy. Bolashaqta bul aǵashtar táýelsiz jastarymyzben birge kórkeıip, jaıqalyp, óse bermekshi.
Sonymen birge Jastar alleıasynda QR-kody bar taqtaısha ornatyldy. Ony skanerleý arqyly oblysymyzdaǵy jastardy qoldaý baǵytyndaǵy atqarylyp jatqan jumystardy jáne jańa jobalardy kórýge bolady.
«Bul alleıa Táýelsizdigimizdiń 30 jyldyq mereıtoıyna jastardyń atynan qala jurtshylyǵyna arnalǵan syı retinde usynyldy. Biz jastardyń usynysyn jerge tastamaı is-sharany uıymdastyrýdy qolǵa aldyq. Sonymen qatar, jastar ózi otyrǵyzǵan árbir aǵashyn esterine saqtap, bolashaqta óz urpaqtaryna maqtan etip, kórsete alady. Osy alleıa keleshekte qalamyzdyń ishindegi taza aýany saqtaýǵa da óz úlesin qosady degen oıdamyn», - deıdi Aqmola oblysy jastar-resýrstyq ortalyǵynyń basshysy Mánsııa Esekeeva.
