Aqmola oblysynda taýdan qulaǵan 21 jastaǵy jigit qutqaryldy
KÓKShETAÝ. QazAqparat – Kókshetaý taýyna shyǵý jastar úshin qaıǵyly jaǵdaımen aıaqtala jazdady. Jańbyrly aýa raıynda shyńdy baǵyndyrmaq bolǵan 21 jastaǵy jigit qulap, qolyn jaraqattap aldy, dep habarlaıdy QazAqparat tilshisi.
Óńirdiń TJD baspasóz qyzmetiniń habarlaýynsha, oqıǵa 14 shilde kúni bolǵan. Qutqarýshylarǵa 21 jastaǵy jigittiń Kókshetaý taýynan qulap ketkeni jáne oǵan medıtsınalyq kómek pen taýdan túsýine járdem qajet ekeni týraly habar kelip túsken.
«Qutqarýshylar dereý oqıǵa ornyna bardy. 11 adamnan turatyn top Kókshetaý taýynyń baýraıyna kóterilgeni belgili boldy. Shamamen 13.00-de jańbyr jaýa bastaǵan, osyǵan baılanysty taıǵaq tasty jerde 21 jastaǵy jigit taıyp ketip, shamamen 2 m bıiktikten qulaǵan. Ol qolynyń aýyrsynǵanyn sezingen», - dedi vedomstvoda.
Bolǵan jaǵdaıdan keıin toptyń bir bóligi taýdan óz betinshe túsken, qalǵan bóligi kómek kútip qalyp qalǵan.
Qutqarýshylar zardap shekken adamdy jedel járdem kóligimen Şýchınsk qalasynyń ortalyq aýdandyq aýrýhanasyna jiberdi.
Aldyn ala tekserýge sáıkes, er adam sol qolynan jaraqat alǵan.
