Aqmola oblysynda tasqyn sý Lenınskoe aýylyndaǵy turǵyn úılerge qaýip tóndirdi
KÓKShETAÝ. QazAqparat - Aqmola oblysynda sý tasqynyna qarsy júrgizilip jatqan sharalar jalǵasýda, dep habarlaıdy «QazAqparat» HAA tilshisi TJD baspasóz qyzmetine silteme jasap.
TJD deregi boıynsha aǵymdaǵy jyldyń 13-17 sáýir aralyǵynda Atbasar jáne Esil aýdandarynda sý tasqynynan eldi mekenderdi ınjenerlik qorǵaý boıynsha jumystar júrgizildi.
«Onyń ishinde Atbasar aýdanynda Jabaı jáne Jylandy ózenderiniń betindegi muzdy jarý jumystary júrgizilip, oǵan 604 keli jarylǵysh zat paıdalanyldy. Shlıýzderdi nyǵaıtý úshin qum salynǵan 5050 qap tóseldi. Sondaı-aq, Atbasar qalasynda Ibarrýrı kóshesi boıynsha jáne JBK kentinde sý deńgeıiniń kóterilýin baqylap, monıtorıng júrgizip otyrý úshin mobıldi beket qoıyldy. Aýdan boıynsha táýligine 6800 tekshe metr sý sorylyp shyǵaryldy.
Sonymen qatar, «Kókshetaý - Atbasar» tas jolynyń 165 shaqyrymynda tereńdigi 20 santımetr, eni 5 metr qar sýy tasydy. Sýdyń aǵysyn buryp, kólik qozǵalysyn qalpyna keltirý úshin 20 tonna ınertti materıaldardy tóseldi. Qazirgi kezde kólik qozǵalysy qalpyna keltirildi.
Esil aýdanynda 00 saǵat 40 mınýtta Chapaev sý qoımasynan aqqan sýdyń saldarynan Esil aýdany Lenınskoe aýyly mańyndaǵy Qyzyl sý ózendegi sýdyń deńgeıi 5,5 metrge deıin kóterildi. Osyǵan baılanysty tasqyn sýy Lenınskoe aýylyndaǵy turǵyn úılerge qaýip tóndirdi. Adam shyǵynyn boldyrmaý úshin, Esil aýdanynyń tótenshe jaǵdaılar bólimi jergilikti atqarýshy organdarmen birlesip Lenınskoe aýylynan 186 adamdy kórshi Krasıvoe aýylynyń orta mektebine kóshirdi. Qazirgi ýaqytta Lenınskoe aýylyna sý basý qaýpi joq, turǵyndar úılerine qaıtty.
Osy kúni Aqmola oblysynda yqtımal sý tasqynyna jol bermeý maqsatynda tótenshe jaǵdaılar departamenti, jergilikti atqarýshy organdar jáne jergilikti polıtsııa qyzmeti birlesip, eldi mekenderdi ınjenerlik qorǵaý boıynsha barlyq qajetti sharalardy júrgizýde», dep kórsetilgen habarlamada.
