Aqmola oblysynda tártip saqshylary 30-dan astam kólikten turatyn kolonnany dittegen jerine jetkizdi

KÓKShETAÝ. QazAqparat - Aqmola oblystyq polıtsııa departamentiniń qyzmetkerleri boranǵa baılanysty jol-kólik oqıǵalaryn boldyrmaý úshin respýblıkalyq jáne oblystyq mańyzy bar avtokólik joldarynda qaýipsizdik sharalaryn kúsheıtti, dep habarlaıdy QazAqparat tilshisi.

Aqmola oblystyq polıtsııa departamenti baspasóz qyzmetiniń málimetinshe, bıylǵy jyldyń 3 qańtarynda aýa raıynyń qolaısyzdyǵyna (qalyń túsken qar men ekpindi jeldiń, borannyń, kórinýdiń shektelýi) baılanysty respýblıkalyq mańyzy bar jol ýchaskelerinde kólik qozǵalysy shekteldi.

Jol-kólik oqıǵalaryn boldyrmaý maqsatynda polıtseıler respýblıkalyq jáne oblystyq mańyzy bar trassalarda kúsheıtilgen qaýipsizdik sharalaryn qolǵa aldy. Sonymen birge, júrgizýshilermen profılaktıkalyq áńgimeler ótkizildi, patrýldik polıtsııanyń qosymsha narıadtary qoıyldy.

Qańtardyń 3-inde tártip saqshylary Ereımentaý qalasynan 32 avtokólikti dittegen jerine jetkizdi.

«Qazirgi ýaqytta «Atbasar-Astana», «Qaraǵandy-Astana» jol ýchaskeleri ashyldy.

«Astana-Pavlodar» avtojoly jabyq kúıinde qalyp otyr. Bul jol beketterinde 256 kólik tur, onyń 166-sy jeńil, 90-y júk kólikteri, jolaýshylar kóligi joq. Bizdiń basty mindetimiz – jol júrý kezinde júrgizýshiler men jolaýshylardyń qaýipsizdigin qamtamasyz etý. Búgin saǵat 12:00-de «Astana-Şýche» avtojoly ashyldy. Kólik quraldary patrýldik polıtsııa narıadtarymen birge júretin bolady», - dep atap ótti jergilikti polıtsııa qyzmeti basqarmasynyń bastyǵy polıtsııa polkovnıgi Aslan Qyzbıkenov.

Osy rette, tártip saqshylary avtokólik ıelerine jyldamdyq rejımin saqtaýǵa, qozǵalys baǵyttaryn túzetýge jáne aýa raıynyń ózgerýi men joldardyń jabylýy týraly arnaıy qyzmetterdiń habarlamalaryn qulaq túrý jóninde keńes beredi.