Aqmola oblysynda taǵy bir jel elektr stansasy iske qosyldy
KÓKShETAÝ. QazAqparat - Aqmola oblysynda jel energetıkasy salasyndaǵy jobalar tabysty iske asyrylýda. Táýelsizdik kúnine oraı Ereımentaý aýdanynda qýaty 30 MVt jel elektr stantsııasy paıdalanýǵa berildi, dep habarlaıdy QazAqparat tilshisi oblystyq ishki saıasat basqarmasyna silteme jasap.
Vedomstvonyń málimetinshe, bul jolǵy jel qondyrǵysynyń qurylysyn «Golden Energy Corp» JShS júzege asyrǵan. Jel elektr stantsııasy Taıbaı aýyldyq okrýginde ornalasqan. Joba qolda bar jel áleýetin ıgerýge, organıkalyq otyndy únemdeýge jáne óńirdegi parnıktik gazdar shyǵaryndylaryn azaıtýǵa baǵyttalǵan.
«Nysan bıiktigi 115 metr, qalaqtary bar 18 macht-týrbınadan turady. Bul qýaty 2 MVt-qa deıingi naryqtaǵy eń jaqsy týrbına jáne jyljymaly aýdany boıynsha ámbebap jel qondyrǵysy. Ol joǵary jáne ortasha jel dálizderinde ónimdilikti qamtamasyz etýge arnalǵan. Búkil álem boıynsha 2000-nan astam osyndaı týrbınalar ornatylyp, jaqsy jaǵynan kórsetip otyr», - deıdi kásiporyn dırektory Anna Omasheva.
Jobanyń quny 5,6 mıllıard teńgeni quraıdy. Jel elektr stantsııasynyń qurylysy kezinde 30 adam jumyspen qamtyldy.
Sonymen qatar, Ereımentaý qalasynyń mańynda qýaty 50 MVt bolatyn taǵy bir «Ereimentau Wind Power» jel elektr stantsııasynyń qurylysy bastaldy. Bul joba boıynsha qýattylyǵy 4,8 MVt bolatyn 11 jel týrbınasynyń qurylysy qarastyrylǵan. Jel qondyrǵysynyń quny 26,6 mıllıard teńgege baǵalanyp otyr. Ony iske qosý 2021 jyldyń tórtinshi toqsanyna josparlanǵan.
