Aqmola oblysynda tabylǵan múrde úsh aı buryn joǵalǵan adamǵa tıesili bolýy múmkin
KÓKShETAÝ. QazAqparat – Aqmola oblysynda ıisshil ıt taýyp alǵan er adamnyń denesi osydan úsh aı buryn joǵalǵan stepnogorlyqqa tıesili bolýy múmkin, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, aǵymdaǵy jylǵy tamyz aıynyń 23-de qalalyq polıtsııa basqarmasynyń kezekshi bólimine Stepnogor qalasynyń 55 jastaǵy turǵyny habarlasyp, kúıeýi Álemjan Májıtovtiy izdeýge kómek suraǵan. Áıeldiń sózinshe, kúıeýi maýsymnyń 1-de úıinen shyǵyp ketip, qaıtyp oralmaǵan.
«Habar-osharsyz ketken adamdy izdeýge qalalyq polıtsııa basqarmasynyń jeke quramy, qoǵam ókilderi baǵyttaldy. Krımınaldy polıtsııa men ýchaskelik polıtsııa ınspektorlary ózderine tıesili aýmaqtardy tekserdi», - dedi vedomstvodan.
Polıtsııa departamentiniń baspasóz qyzmetinen atap ótkendeı, izdestirý jumystary barysynda 2-shi qyrkúıek kúni batpaqty aýmaqtan er adamnyń múrdesi tabyldy. Ony 3517 áskerı bólimniń qyzmetkeri Aleksandr Frolov pen qyzmettik ıti «Taı» tapqan. Múrdedegi kıim Álemjan Májıtovke tıesili. Qazirgi kezde, sot-medıtsınalyq saraptama júrgizilýde.
