Aqmola oblysynda tabylǵan medıtsınalyq qaldyqtar boıynsha tergeý júrip jatyr
KÓKShETAÝ. QazAqparat - Aqmola oblysy aýmaǵynda medıtsınalyq qaldyqtardy laqtyryp tastaý oqıǵasyna baılanysty tergeý sharalary júrgizilýde, dep habarlaıdy QazAqparat tilshisi oblystyq qoǵamdyq densaýlyqty qorǵaý departamentine silteme jasap.
Vedomstvonyń málimeti boıynsha, 2019 jylǵy aqpannyń 3-de Shortandy aýdandyq qoǵamdyq densaýlyqty qorǵaý basqarmasyna Klıýchı aýylynan 1,5 shaqyrym jerdegi joldyń boıynda medıtsınalyq qaldyqtardy (qany bar probırka men shprıtster) belgisiz bireýlerdiń laqtyryp ketkendigi týraly aqparat túsken.
«Shortandy aýdandyq qoǵamdyq densaýlyqty qorǵaý basqarmasy men aýdandyq polıtsııa bólimi jáne Shortandy ortalyq aýdandyq aýrýhanasynyń medıtsınalyq qyzmetkerleri birlesip, atalǵan aýmaqty zerttep, atalmysh aqparatty rastady.
Medıtsınalyq qaldyqtar qaýiptiligine baılanysty plastmassa konteınerlerdiń ishinde boldy. Bul qaldyqtar Astanadaǵy Ulttyq Ǵylymı Kardıohırýrgııalyq ortalyqqa tıesili», - dep túsindirdi Aqmola oblystyq Qoǵamdyq densaýlyqty qorǵaý departamentindegiler.
Atalmysh oqıǵa boıynsha, Shortandy aýdanynyń ákimdigine, Aqmola oblysynyń ekologııa departamentine, Aqkól aýdanynyń ulttyq qaýipsizdik komıteti jáne Aqmola oblysynyń jáne tabıǵatty qorǵaý prokýratýralaryna joldandy.
«Basqarmanyń málimetine saı, 2019 jyldyń 5-shi aqpandaǵy jaǵdaıǵa baılanysty Astanadaǵy «Kazpererabotka» JShS medıtsınalyq qaldyqtardy odan ári zalalsyzdandyrý boıynsha atalmysh aýmaqtan alyp ketti. Qazirgi kezde quzyrly organdar tergeý jumystaryn júrgizýde sonyń qorytyndysy boıynsha kináli tulǵalar jaýapqa tartylady», - dep tolyqtyrdy vedomstvodan.
