Aqmola oblysynda tabylǵan kesene «Jánibek hanǵa» tıesili bolýy múmkin

KÓKShETAÝ. QazAqparat - Qorǵaljyn aýdany aýmaǵynda tabylǵan ortaǵasyrlyq keseneniń qaldyqtaryn zertteý jumystary júrgizilýde. Japonııa elinde júrgizilip jatqan genetıkalyq taldaý Qazaq handyǵynyń negizi qalaýshylardyń biri – Jánibek hanǵa tıesili ekendigin bildirse, onda bul tarıhı sensatsııa bolady. Bul týraly oblystyq mádenıet, arhıvter men qujattamalar basqarmasy basshysynyń mindetin atqarýshy Gúlmıra Beknazarova jýrnalıstermen ótken brıfıngte aıtty, dep habarlaıdy QazAqparat tilshisi oblystyq ishki saıasat basqarmasyna silteme jasap.

«2018 jyly oblystyq mýzeıge arheologııalyq qazba jumystaryn júrgizý úshin berilgen lıtsenzııanyń arqasynda Qorǵaljyn aýdany aýmaǵynda ornalasqan Jánibek hannyń ortaǵasyrlyq kesenesiniń qırandylaryn ǵylymı-zertteý boıynsha qolǵa alynǵan jumystar aıaqtalýǵa taıaý. Bul jobaǵa 2019 jyly oblys ákimdigi tarapynan qarjylaı qoldaý kórsetildi», - deıdi Aqmola oblysynyń mádenıet, arhıvter men qujattamalar basqarmasy basshysynyń mindetin atqarýshy Gúlmıra Beknazarova.

Basqarma basshysy atap ótkendeı, keseneni zertteý jumystary 2 kezeńmen júrgizilgen. Jánibek-Shalqar kesenesiniń qırandylarynan tabylǵan zattardy jan-jaqty zerttegennen keıin ǵalymdar osynda han áýletiniń ókilderi jerlengen degen qorytyndyǵa kelgen.

«Tabylǵan arheologııalyq jádigerler Nur-Sultandaǵy Qazaqstan Respýblıkasynyń Ulttyq mýzeıine ótkizilip, sodan keıin Reseıdegi antropologııalyq kórinisti anyqtaý úshin Japonııaǵa genetıkalyq saraptamaǵa jiberildi. Zertteý qorytyndysy bıylǵy jyldyń sońynda shyǵarylady. Biraq biz qazirdiń ózinde tarıhı sensatsııanyń aldynda turmyz dep úmittenemiz», - dep tolyqtyrdy Gúlmıra Beknazarova.

Aıta keteıik, óńirde «Rýhanı jańǵyrý» baǵdarlamasymen 4 bazalyq joba qolǵa alynýda. Bul maqsatta belgili tulǵalar qurmetine qoıylǵan eskertkishter men mazarlardy jańǵyrtý jumystary júrgizilip turady. Jyl basynan beri oblystaǵy 11 murjaı jetekshiligimen 1 595 ekskýrsııa, 439 lektsııa, 238 kórme uıymdastyrylyp, 936 murajaı zattary alynyp, zertteý júrgizilgen. Bıylǵy jyly mádenıet mınıstrligi uıymdastyrǵan respýblıkalyq baıqaýda Aqmola oblysynyń tarıhy mýzeıiniń «Eń úzdik oblystyq mýzeı» atanýy – aımaqtyń mádenı ómirin jaqsartýǵa qosqan úlestiń jemisi deıdi mádenıet ókilderi.