Aqmola oblysynda sýıtsıd jasamaq bolǵan 14 jastaǵy jasóspirim qutqaryldy
KÓKShETAÝ. QazAqparat - Aqmola oblysynda ýchaskelik polıtsııa ınspektory sýıtsıd jasamaq bolǵan 14 jastaǵy jasóspirim qyzdy qutqardy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, 8 sáýirde Jaqsy aýdanynyń Perekatnoe aýylynda bolǵan.
«Jaqsy aýdandyq PB kezekshi bólimine Perekatnoe aýylynyń 28 jastaǵy turǵyny telefon arqyly habarlasyp, óziniń 32 jastaǵy ápkesi kámeletke tolmaǵan qyzyn uryp jatqanyn aıtty», - dedi polıtsııa.
Kýágerlerdiń aıtýynsha, úıde janjal shyǵarǵan áıel qyzyn moınynan qysyp tunshyqtyrǵan. Sonymen birge ony jáne kishi inisi men sińilisin balalar úıine beretinin aıtyp qorqytqan.
«Aıtylǵan mekenjaıǵa dereý jetken ýchaskelik ınspektor úsh balanyń anasyn óz úıinde mas kúıinde tapty. Osy kezde áıeldiń 11 jasar qyzy úıge júgirip kelip, ýchaskelik polıtsııa ınspektoryna 14 jastaǵy úlken ápkesi qoranyń ishinde asylyp qalǵanyn aıtty. Ýchaskelik polıtsııa ınspektory Danııar Nurǵamıde dereý qorada asylyp turǵan jasóspirimdi bosatyp aldy.
Esinen tanyp qalǵan qyzdy jedel járdem qyzmeti alyp ketti. Qazir onymen psıhologtar jumys istep jatyr», - dedi vedomstvodan.
