Aqmola oblysynda sýǵa shomylý maýsymy bastalǵaly 4 bala sýǵa ketti
KÓKShETAÝ. QazAqparat - Aqmola oblysynda sýǵa shomylý maýsymy bastalǵannan beri barlyǵy 6 adam sýǵa ketti. Onyń 4-ýi balalar. Bul týraly óńirlik kommýnıkatsııalar qyzmetinde ótken Aqmola oblystyq TJD basshysynyń orynbasary Qanat Dospaev málim etti.
TJD basshysy orynbasarynyń aıtýyna qaraǵanda, oblys aýmaǵynda barlyǵy 754 sý toǵany bar. Onyń 605-i tabıǵı sý aıdyny bolsa, ózgesi demalys jáne balyq aýlaý úshin paıdanylatyn qoldan jasalǵan toǵandar. Nura men Esil ózenderi sýǵa shomylýǵa qaýipti bolyp otyr. Bul ózenderde sońǵy úsh jylda 25 adam (onyń 8-i bala) sýǵa ketken.
«Bıylǵy jyldyń sýǵa shomylý maýsymy bastalǵannan beri adam óliminiń alty oqıǵasy tirkeldi. Onyń ishinde 4 bala bar. Tselınograd aýdanynyń sý aıdyndarynda úsh adam, Astrahan aýdanynda eki adam, Atbasar aýdanynda bir adam sýǵa ketken. Sondaı-aq, jyl basynan beri oblystyń toǵandarynda biz esepke almaǵan 14 qaıǵyly oqıǵa boldy. Adam óliminiń negizgi sebepteri - balalardy eresekterdiń qaraýynsyz qaldyrý jáne óz kúshin baǵalamaý. Barlyq oqıǵalar kúzetilmeıtin sý aıdyndarynda tirkelgen», - dedi Q. Dospaev óz sózinde.
