Aqmola oblysynda sý tasqynynyń shyrqaý shegi 2-3 kún ishinde oryn alady
ASTANA. QazAqparat - Qazaqstannyń birqatar óńirinde sý tasqynynyń ekinshi tolqyny kútilýde. Bul týraly búgin Qazaqstannyń Ortalyq kommýnıkatsııalar qyzmetindegi brıfıngte QR Іshki ister mınıstrligi Tótenshe jaǵdaılar komıtetiniń tóraǵasy Vladımır Bekker málim etti, dep habarlaıdy QazAqparat.
«Batysta sý tasqynynyń ekinshi tolqynyn kútip otyrmyz. Bul sáýir aıynyń sońynda Reseı Federatsııasy aýmaǵynan keletin Jaıyq ózeninen týyndaıdy. Shyǵys Qazaqstan oblysynda sý tasqynynyń alǵashqy tolqyny ótti. Bul kezeń Qaraǵandy, Aqmola, Soltústik Qazaqstan jáne Qostanaı oblystary úshin aıryqsha kúrdeli boldy», - dedi komıtet basshysy.
Onyń sózine qaraǵanda, Soltústik Qazaqstan oblysyndaǵy ahýal birqalypty. Óńirge jaýǵan qalyń qar birtindep erip jatyr. Bul aımaqta qajet bolǵan jaǵdaıda oblys halqyna kómek kórsetý úshin adam kúshi men tehnıka jumyldyrylǵan.
«Aqmola oblysynda sý tasqynyń shyrqaý shegi 2-3 kúnnen keıin oryn alady dep kútýdemiz. Shamamen ol Atbasar, Astrahan jáne Tselınograd syndy aýdandarda bolady», - dedi Bekker.
Aıta keterligi, bıylǵy sý tasqyny kezeńine daıyndyq jumystary ótken jyly bastaldy. Tek aǵymdaǵy jyldyń ishinde ǵana 1,5 shaqyrym qorǵaý bógenderi salynyp, 17 shaqyrymǵa jýyq qorǵaý bógeni jóndeýden ótkizildi, 9 shaqyrymnan astam ýaqytsha bógen salyndy. 23 shaqyrymnan astam ózen arnasynyń jaǵasy nyǵaıtylyp, 35,5 shaqyrym ózenniń túbi tereńdetildi, avtomobıl joldary men kópirler astyndaǵy 20 myń jáne temirjol jelileri astyndaǵy 4 myńǵa jýyq sý jiberý qubyrlary tazartyldy.
Sý tasqyndarynyń aldyn alý jáne onyń saldaryn joıý úshin 8 myńnan astam tonna janar-jaǵarmaı qory, 234 myń tonna ınertti materıaldar, 1 mln-nan astam tonna qaptar men 20 tonna kólemindegi jarylǵysh zat qorlary daıyndaldy. Halyqty qaýipsiz jerge kóshirý qajet bolǵan jaǵdaıda jergilikti atqarýshy organdarmen 1700-den astam adam qabyldaıtyn pýnkt daıyndaldy, qajetti kólik anyqtaldy.
