Aqmola oblysynda sý tasqynynyń aldyn alý jónindegi jedel shtab quryldy
KÓKShETAÝ. QazAqparat – Aqmola oblysynda kóktemgi sý tasqyny qaýip-qateriniń aldyn alý boıynsha daıyndyq sharalary júrgizilýde. Oǵan barlyq múddeli memlekettik organdar men uıymdar jumyldyrylyp otyr. Bul týraly óńirlik kommýnıkatsııalar qyzmetinde ótken brıfıngte Aqmola oblystyq Tótenshe jaǵdaılar departamenti basshysynyń orynbasary Qanat Dospaev aıtty, dep habarlaıdy QazAqparat tilshisi.
Brıfıngte málim bolǵanyndaı, bıylǵy kóktemgi sý tasqyny qateriniń aldyn alý jumystary ótken jyly jazda bastalǵan. Osy baǵytta tótenshe jaǵdaılar departamentine 2021 jylǵy oblystyq bıýdjetten sý tasqynyna qarsy is-sharalardy ótkizýge 72 mıllıon teńge somasynda qarajat bólingen. Al, tótenshe jaǵdaıǵa jáne ákimdikterge shuǵyl járdem shyǵyndary úshin 643,4 mıllıon teńge qarastyrylyp otyr.
«Óńirlerdiń ákimdikteri 43 eldi mekende uzyndyǵy 47,1 shaqyrym sý burý arnalaryn ornatý, 5,2 shaqyrym topyraq úıilgen bógetterdi nyǵaıtý, 4,8 shaqyrym topyraqtan bógetter salý, 24,4 shaqyrym ózen arnalaryn tazartý, 50 sý ótkizý qurylystaryn ornatý jáne jóndeý jumystaryn júrgizdi. Jaqynda 10 aýdanda ózen muzyn qopsytý jáne jarý jumystary bastalady», – dedi Qanat Dospaev.
Sý basý qaýpi joǵary aımaqtar sanalatyn Arshaly aýdanynda 9 eldi mekende sý tasqynyna qarsy is-sharalar ótkizildi. Eldi mekenderdi ınjenerlik qorǵaý is-sharalarynyń josparyna sáıkes, Esil ózeni arnasynyń boıynda ornalasqan Jibek joly jáne Túrgen aýyldaryndaǵy turǵyn úılerdiń aýlalaryna topyraqtan bógetter turǵyzý, jyralardy, sý ótkizý qurylystary men ózen arnalaryn ósimdikterden tazartý jumystary júrgizilýde.
«Naýryzdyń 25-de departament janynan kóktem merzimin apatsyz ótkizý jónindegi oblystyq jedel shtab quryldy. Sonymen birge, turǵyndardy qaýipti aımaqtardan evakýatsııalaý úshin 222 pýnkti ázirlendi, tamaqtandyrý úshin 69 kelisimshart jasaldy, 1544 kerýet pen 3740 tósek daıyndaldy. Qazgıdromettiń gıdrobeketterinen bólek, qosymsha 89 baqylaý beketterinde táýlik boıy kezekshilik uıymdastyrylady. Kóktemgi sý tasqynynyń aldyn alý jumystary Atbasar, Arshaly, Tselınograd jáne Astrahan aýdandarynda da júrgizilýde», - dep túıindedi Qanat Dospaev.
Jalpy, qazirgi kezde Aqmola oblysyndaǵy eldi mekenderden barlyǵy 443,3 myń tekshe metrden astam qar kúreldi, sondaı-aq, 345,8 tonna janar-jaǵarmaı, 11,6 myń tonna ınertti materıal, 87,2 myń qaptar daıyndaldy, 1 myńnan astam arnaıy tehnıka tolyq daıyndyqqa keltirildi.
