Aqmola oblysynda sý tasqynynyń aldyn alý shtabtary jumysyn toqtatyp jatyr
Aqmola oblysy ákimdigi baspasóz qyzmetiniń málimetinshe, eldi mekender manyndaǵy gıdrotehnıkalyq qurylystar, sý bógetteri zertteldi, Jabaı, Shaǵalaly, Aıdabol bógeti, Shaǵalaly sý qoımasy ózenderiniń arnalaryna nazar aýdaryldy. Qar jamylǵysynyń, erigen qar sýynyń jınalatyn oryndary, Jabaı ózeniniń boıynda ornalasqan eldi mekender men avtokólik joldary arqyly ótetin tustary tekserildi.
Osy rette, Zerendi jáne Sandyqtaý aýdandarynda úlken kólemde qar qory bar ekeni anyqtaldy. Atbasar qalasy boıynsha Jabaı ózeninde sýdyń deńgeıi qalypty, eldi mekenderdi sý basý qaýpi joq. Atbasar, Sandyqtaý aýdandarynda jáne oblystyq shtab táýlik boıy jumys isteıdi. Jalpy Tselınograd, Arshaly jáne Ereımentaý aýdandarynda sý tasqyny jaǵdaıy turaqty, qaýip joq, atalǵan óńirlerde aýdandyq shtabtar jumysyn toqtatqan.
«Sý tasqynyna jol bermeý jáne erigen sýlardyń aǵýyn ýaqtyly baqylaý jáne den qoıý – búgingi kúnniń basty máselesi. Bul baǵyttaǵy jumys qarqynyn báseńdetpeýdi suraımyn. Úlken jumys atqaryldy, sonda da jaǵdaı táýlik boıy baqylaýda bolýy tıis», - dedi aımaq basshysy.
Vedomstvodan atap ótkendeı, sý tasqyny qaýpi bar aımaqtardy áýeden sholý nátıjeleri boıynsha eldi mekenderdi jáne kólik ınfraqurylymyn sý basýǵa jol bermeý jóninde tıisti sheshimder qabyldanatyn bolady.
Aıta ketsek, oblys aýmaǵyndaǵy Qarasý, Kolýton, Jylandy, Jabaı jáne Nura ózenderindegi 25 ýchaskede muz jarý jumystary júrgizildi. Budan basqa, yqtımal táýekelderdi monıtorıngileý jáne sý tasqyny qaýpi bar ózender men gıdrotehnıkalyq qurylystarda jedel sharalar qabyldaý úshin táýlik boıy jumys isteıtin 92 baqylaý beketi qoıyldy.
Aıta ketsek, budan buryn Kókshetaýda birneshe kósheni sý basqanyn jazǵan bolatynbyz.
