Aqmola oblysynda sý tasqynynan zardap shekkenderge gýmanıtarlyq kómek kórsetilýde
ASTANA. QazAqparat - Aqmola oblysynda sý tasqynynan zardap shekken turǵyndarǵa kómek kórsetý boıynsha keń aýqymdy jumystar jalǵasýda.
«Nur Otan» partııasynyń Aqmola oblystyq fılıalynda azyq-túlik pen qajetti zattardy qabyldaý pýnkti jumys istep tur, dep habarlady Aqmola oblysynyń ishki saıasat basqarmasynan.
«Azyq-túlik pen qajetti buıymdardyń alǵashqy partııasy búgin Atbasarǵa jiberildi. «Nur Otan» partııasy Aqmola oblystyq fılıaly tóraǵasynyń birinshi orynbasary Ǵalym Bekmaǵambetov Atbasar aýdanyna azyq-túlik pen qajetti buıymdar alyp bardy», - dep atap ótti ishki saıasat basqarmasynan.
Oblystyq shtabtyń eriktileri men belsendileri gýmanıtarlyq kómektiń taǵy bir bóligin ázirlep jatyr. Sonymen birge, partııanyń barlyq aýdandyq fılıaldarynda azyq-túlik pen qajetti zattardy qabyldaıtyn oryndar ashyldy. «Nur Otan» partııasynyń oblystyq jáne qalalyq fılıaldarynyń qyzmetkerleri de syrt qalǵan joq, olar birkúndik eńbekaqylaryn zardap shekkenderge kómek retinde aýdardy.
Býrabaı aýdanynda jyly kıimder men azyq-túlik qabyldaıtyn eki pýnkt ashyldy. Mundaǵy uıymdar men kásiporyndardyń basshylary, kásipkerler, Іsker áıelder qaýymdastyǵy, «Şýchınskiniń meıirimdi júrekteri» eriktiler klýby óz jerlesterine qol ushyn sozýda.
Tselınogradtyń «Meıirimdiler klýby» sý tasqynynan zardap shekkenderge qarjylaı kómek jınaýdy uıymdastyryp, 14 otbasyna járdem kórsetti. Qazirgi ýaqytta 20 úıdi sý basqan Novoıshımka aýyldyq okrýgi Semenovka aýylynyń turǵyndaryna qarajat jınalýda.
Odan bólek, Mádenıet jáne sport mınıstrligi járdem berý týraly bastama kóterip, Atbasar qalasyna azyq-túlik, un men kúrish jiberdi. Mınıstrliktiń partııalyq uıashyǵy arnaıy esepshotqa birkúndik jalaqylaryn aýdardy.
«Medıa-tsentr» respýblıkalyq qoǵamdyq birlestigi Aqmola oblysynyń aýdandaryna qoldaý bildirý boıynsha Astana qalasynyń sýpermarketteri arasynda naýqan uıymdastyrýda.
Buǵan deıin habarlanǵandaı, Kókshetaýdaǵy dostyq úıinde aqshalaı qarajat jınaý pýnkti ashyldy. Taǵy bir esepshot ashqan Qazaqstan halqy Assambleıasy Aqmola oblystyq fılıalynyń habarlaýynsha, osy kúnge deıin 5 mıllıon teńgeden astam qarjy jınalǵan. Aqshalaı kómek «Jan jylýy» qoǵamdyq qaıyrymdylyq qorynan, Kókshetaý qalasynyń «Ortalyk bazarynan» jáne ózge de beı-jaı qaramaǵan azamattardan kelip tústi.
Azyq-túlik pen qajetti zattar jınaý jumystary áli de jalǵasýda.
