Aqmola oblysynda sý tasqynynan zardap shekkenderge arnalyp úı salyna bastady
KÓKShETAÝ. QazAqparat - Atbasar qalasynda sý tasqynynan zardap shekkender úshin kóppáterli 11 turǵyn úıdiń qurylysy bastaldy, dep habarlaıdy «QazAqparat» HAA tilshisi.
Óńirlik kommýnıkatsııalar qyzmetiniń málimeti boıynsha osydan birer kún buryn Atbasar qalasyndaǵy 1-shi shaǵyn aýdan aýmaǵynda jańa kópqabatty turǵyn úı kesheniniń qurylysy bastalǵan. Qazirgi kezde, qurylys alańyna arnaıy tehnıkalar men konteınerler jetkizilgen. Ekskavator alǵashqy qazanshuńqyrdy qazyp, geodezıster jumys júrgizýde.
Eske sala ketsek, bıyl kóktemdegi sý tasqyny saldarynan aýdan boıynsha 650-den astam nysan zardap shekken bolatyn. Sonyń ishinde 644 turǵyn úı, Atbasar qalasyndaǵy №1 orta mektep pen «Esil» balalardyń saýyqtyrý kesheni jáne kóliktik kommýnıkatsııalar júıesine zaqym keldi.
Shyǵyn kólemin esepteý maqsatynda qurylǵan komıssııa sarapshylary 467 turǵyn úıdi apattyq dep tanysa, 36 úıdi buzylǵanyn anyqtady. Sondaı-aq, 168 turǵyn úıge kúrdeli jóndeý jumystary qajet dep sheshti.
Jaqynda BAQ ókilderimen ótken kezdesýde Aqmola oblysynyń ákimi Málik Myrzalın Atbasar aýdanyna tasqyn sýdyń saldaryn joıý úshin oblystyq bıýdjetten 513 mıllıon teńge bólingenin atap ótti. Budan bólek, arnaıy ashylǵan qaıyrymdylyq esep shotynan 30 mıllıon 500 myń teńge qarjy bólindi.
