Aqmola oblysynda sý tasqynyna qarsy sharalar talqylandy
KÓKShETAÝ. QazAqparat – Aqmola oblysynyń ákimi Ermek Marjyqpaev tóraǵalyǵymen kóktemgi sý tasqynyn apatsyz ótkizý týraly apparat májilisi ótti, dep habarlaıdy QazAqparat tilshisi ákimdiktiń baspasóz qyzmetine silteme jasap.
«Bıylǵy jyly oblys aýmaǵynda qar jyldaǵymen salystyrǵanda 2,5-3 ese kóp tústi. Mundaı sońǵy jyldary bolǵan emes. Sondyqtan, daıyndyqty búginnen bastaǵanymyz mańyzdy», - dedi aımaq basshysy.
TJD bastyǵy Alekseı Sovetov qazirgi kezde qabyldanyp jatqan sharalar týraly aıtty.
Onyń aıtýynsha, sý basý qaýipi bar aımaqtarda ınjenerlik qorǵaý boıynsha josparǵa sáıkes 16 aýdannyń 54 eldi mekenderinde sý tasqynnyń aldyn alý boıynsha ınjenerlik-qorǵanys is-sharalary júzege asyrylǵan. Onyń ishinde 26,8 shaqyrym sý ótkizgish aryqtary keńeıtildi jáne tereńdetildi, 16,5 shaqyrym bógetterdi jóńdeý jáne nyǵaıtý jumystary júrgizildi, 17,1 shaqyrym qaýipti aýmaqtarǵa topyraq úıindileri men bógetter turǵyzyldy.
«Búgingi kúnge deıin oblys boıynsha tótenshe jaǵdaıdyń aldyn alý úshin 170,3 tonna janar-jaǵar maı, 4,5 myń tonna ınerttik materıaldar, 36,1 myń qapshyqtar qory daıyndaldy. Budan bólek, jergilikti atqarýshy organdardyń kúshteri men quraldary arqyly 2336 adam men 922 birlik tehnıka ázirlendi. Aqmola oblysy aýmaǵynda sý basqyny oryn ala qalǵan kezde eskertý jáne zardaptaryn joıý úshin QR ІІM jeke quramynan 524 adam jáne 111 tehnıka, 12 júzý quraly, 107 motopomp (onyń ishinde TJD 218 adam, 56 tehnıka jáne 12 júzý quraly) jumyldyrý josparlanǵan», – dedi Alekseı Sovetov.
Sonymen qatar, «Qazgıdromettiń» Aqmola oblysy boıynsha fılıalynyń dırektory Baqyt Maqajanova, «Qazsýshar» kásiporny Aqmola fılıalynyń dırektory Ýálı Dáliniń baıandamalary tyńdaldy.
