Aqmola oblysynda sý tasqynyna baılanysty jaǵdaı turaqty - TJD
KÓKShETAÝ. QazAqparat - Aqmola oblysynda sý tasqynyna baılanysty jaǵdaı turaqty. Bul týraly Məlik Myrzalınniń tóraǵalyǵymen ótken kóktemgi sý tasqynynyń aldyn alý məselesi qaralǵan keńeste aıtyldy, dep habarlaıdy QazAqparat tilshisi.
Keńeske selektorlyq rejimde aýdan, qala əkimderi men sý tasqynynyń aldyn alý sharalaryn ótkizýge qatysty memlekettik organdar men uıymdardyń ókilderi qatysty.
Oblystyq tótenshe jaǵdaılar departamentiniń basshysy Alekseı Sovetov óńirdegi sý tasqynynyń aldyn alý baǵytyndaǵy atqarylyp jatqan jumys jaıynda jan-jaqty baıandap berdi.
«12-19 naýryz aralyǵynda oblysymyzdyń 9 aýdanynda jalpy aýmaǵy 18,2 myń sharshy metr bolatyn muz alańyn jarý jumystary júrgizilgen. Іshki ister organy tótenshe jaǵdaılardyń aldyn alý sharalary úshin 524 adamnan turatyn arnaıy top quryp, 109 tehnıka daıyndasa, jergilikti atqarýshy organdar apattyń aldyn alýǵa qajetti 3281 adamnan turatyn eriktilerdi jasaqtap, 1707 tehnıkany əzirlep otyr. Sonymen birge, apat bola qalǵan jaǵdaıda adamdardy qabyldaıtyn 197 qabyldaý qosyny da daıyn. Apattyń aldyn alý úshin jurtshylyqty habarlandyrý maqsatynda tótenshe jaǵdaılar departamentiniń saıtyna aqparattar jarııalanyp turady. Oǵan qosa, «Facebook», «VKontakte»əleýmettik jelileri arqyly da tótenshe jaǵdaı qaýpine oraı aqparattar berilýde. Jol qyzmetkerleri sý aǵatyn júlgelerdi tazartý jumystaryn aıaqtady. Onyń ishinde avtokólik jəne temirjol kópirleri bar. Búgingi kúnge deıin oblystyq mańyzy bar 805 qurylǵy jəne 44 kópir tazartylǵan», - dedi Alekseı Sovetov.
Oblys əkimi jergilikti atqarýshy organ basshylary men apattyń jekelegen ujym ókilderiniń aldyna naqty tapsyrmalar júktedi. Onyń ishinde jergilikti atqarýshy organdardyń təýlik boıy sý deńgeıin baqylaýda ustaýy, apattyń aldyn alýǵa qajetti sharalardy júzege asyryp, bógetterdi kóterý, ınertti zattardy, tehnıkany daıyndaý sııaqty mindetter bar. Qardyń jappaı erýi naýryzdyń sońy men səýirdiń alǵashqy jartysynda bolady dep kútilýde. Oblys basshysy osy kezeńde aıtyp kelmeıtin apattyń aldyn alý, oǵan jol bermeý sharalaryna jergilikti atqarýshy organdar men tıisti uıymdar barynsha jete kóńil bólýleri tıis ekendigin qatań eskertti.
