Aqmola oblysynda sý tasqynymen kúres jumystary kúsheıtildi
KÓKShETAÝ. QazAqparat- Aqmola oblysynyń keıbir aýdandarynda sý tasqynynyń qaýpi saqtalýda, dep habarlaıdy QazAqparat tilshisi.
Aqmola oblystyq tótenshe jaǵdaılar departamenti bastyǵynyń orynbasary, azamattyq qorǵanys podpolkovnıgi Qanat Dospaev jýrnalıstermen brıfıng ótkizip, oblys aýmaǵyndaǵy sý tasqynynyń qaýpi men onyń aldyn alý jumystary jóninde aıtyp berdi.
Qanat Dospaevtyń aıtýynsha, búgingi kúni oblys aýmaǵynda sý tasqyny jaǵdaıy shıelenisken. Eldi-mekenderde turǵyn úı sektorlary men nysandardy aǵyn sýdan qorǵaý boıynsha sharalar táýlik boıy úzilissiz júrgizilýde.
«Oblystyń Kókshetaý, Stepnogorsk qalalary men Birjan sal, Ereımentaý, Shortandy, Aqkól, Býrabaı, Bulandy, Egindikól aýdandarynda jaǵdaı turaqtandy.
Tselınograd, Astrahan, Zerendi, Arshaly aýdandarynda jáne Atbasar qalasynda ázirge jaǵdaı qıyn. Munda 15 eldi mekendi sý alý qaýpi saqtalýda. Onyń ishinde Nura men Esil ózenderindegi sýdyń deńgeıi kóterilýi saldarynan Talapker, Aşykól, Aqmeshit, Maksımovka, Nura, R.Qoshqarbaev, Preobrajenka, Qabanbaı batyr, Qyzyl jar, Orazaq, Qaraótkel, Taıtóbe, Qosshy, Otaýtúsken, Birlik aýyldaryna qaýip bar», deıdi Qanat Dospaev.
Departament bastyǵynyń orynbasary atap ótkendeı, qazirgi kezde Tselınograd aýdanynyń aýmaǵynda aýqymdy jumystar júrgizilýde. Munda oblystyq tótenshe jaǵdaı men jergilikti atqarýshy organdardyń kúshi jumyldyrylyp, 379,2 myńnan astam sý sorǵytyldy, 130 tonna ınerttik materıal men qum salynǵan 1820 qap tóseldi. 
«Sondaı-aq, Atbasar qalasyndaǵy №1 ındýstrıaldy-tehnıkalyq kolledj jáne korrektsııalyq mekteptiń aýmaǵy qum tóselgen qaptarmen qorshalýda. Qazirgi kezde qum salynǵan 840 qap tóseldi. Bul jumystarǵa Aqmola oblysynyń TJD jeke quramynan 37 adam jáne 3 tehnıka, jergilikti atqarýshy organdarynyń 9 qyzmetkeri men 6 tehnıkasy jumyldyrylýda.
Budan bólek, temir jol kópiri aýdanynda jáne Jabaı ózeniniń basqa da ýchaskelerinde keptelisterdi boldyrmaý úshin muz jarý jumystary júrgizilýde. Barlyǵy 4 muz keptelisteri joıyldy.
Jalpy, oblys boıynsha kóktemgi sý tasqynynyń aldyn alý sharalaryna barlyǵy 204 adam, 45 arnaıy tehnıka 12 motopompa jáne 3 júzý quraly jumyldyrylǵan», dep tolyqtyrdy Qanat Dospaev.
