Aqmola oblysynda sý tasqyny qaýpiniń beti qaıta bastady - aımaq basshysy
KÓKShETAÝ. QazAqparat - Aqmola oblysynyń ákimi Málik Myrzalın sý tasqynynyń aldyn alý maqsatynda qaýipti sanalatyn aımaqtardy tikushaqpen áýeden baqylap shyqty, dep habarlaıdy QazAqparat tilshisi aımaq basshysynyń týrızm jónindegi keńesshisi Marat Iǵalıge silteme jasap.
Onyń aıtýynsha, Atbasar qalasynda oblys ákimi sý tasqynyn boldyrmaý maqsatynda qolǵa alynǵan sharalar aıasynda salynǵan ınjenerlik nysandardyń beriktigin tekserdi. Kúz jáne qys aılarynda «Atbasar-Qıma» tas jolynyń boıynda sý ótkizetin qubyr ornatyldy. Jabaı ózeniniń sol jaq jaǵasy men burynǵy saǵasy, ıaǵnı, «Atbasar-Qıma» tas jolynyń avtokólik kópiri tusyndaǵy uzyndyǵy 450 metr aýmaq tazartyldy. Úsh sý ótkizetin nysan aýystyrylyp, jóndeldi. Atbasar qalasynyń ózen aýmaǵyndaǵy 7900 metr jer jáne temirjol kópiriniń astyndaǵy ózenniń arnasyn keńeıtý jáne tereńdetý boıynsha júrgizilgen jumystar aıaqtaldy.
«Sýdyń qalypty deńgeıden joǵary bolǵanyna qaramastan, barlyq qyzmetterdiń jumyla jumys isteýiniń arqasynda qaýiptiń beti qaıta bastady», dep atap ótti Málik Myrzalın.
Sonymen qatar, oblys ákimi azamattyq qorǵanys jáne aýdan basshylyǵyna sý tasqynynyń aldyn alý jumystaryn baqylaýda ustap, tabıǵattyń tosyn syıyna daıyn bolýdy tapsyrdy.
Aımaq basshysy ótken jyly tasqyn sýdan zardap shekken atbasarlyqtar úshin salynyp jatqan jańa turǵyn úıdiń qurylysyna nazar aýdardy. Merdigerlerge jumys qarqynyn arttyrýdy jáne turǵyn úılerdi ýaqtyly ári sapaly salýdy talap etti.
Jalpy, Aqmola oblysynda 84 eldi mekende sý arnalaryn keńeıtý (28,4 km), ýaqytsha bóget turǵyzý (39,4 km), bógetterdi nyǵaıtý (12,1 km) boıynsha ınjenerlik jumystar júrgizildi.
«Aqmola oblysynda 96 baqylaý beketi, 29 gıdrobeket, 19 meteobeket, 10 agrometeobeket, 8 kólderdiń gıdrobeketi ornalasqan. Naýryzdyń 12-19 aralyǵynda oblystyń toǵyz aýdanynda ózen-kólderdiń betindegi 18,2 sharshy metr aýmaqta muz jarý jumystary júrgizildi», - dep túsindirdi ákimniń keńesshisi.
