Aqmola oblysynda sý tasqyny qaýpi seıildi
KÓKShETAÝ. QazAqparat – Aqmola oblysynda sý tasqynynyń qaýpi seıildi. Qaýipti aýdandarǵa attanǵan qutqarýshylar úılerine oraldy, dep habarlaıdy QazAqparat tilshisi oblystyq TJD baspasóz qyzmetine silteme jasap.
Vedomstvonyń málimetinshe, naýryzdyń basynda oblystyń tórt aýdanyna kóktemgi sý tasqynynyń aldyn alý sharalaryn uıymdastyrý úshin 142 qutqarýshy kómekke barǵan bolatyn.
«Sý tasqyny kezinde apatty qutqarý jumystaryn júrgizý úshin TJ departamenti men jergilikti atqarýshy organdardyń qyzmetkerlerinen jasaqtalǵan 2410 qutqarýshy, 1058 birlik tehnıka jáne 60 júzý quraly, 251 motopompa ázirlendi. Onyń biraz bóligi aldyn ala Astrahan, Atbasar, Arshaly, Tselınograd aýdandaryna jiberildi. Qutqarýshylardyń basty mindeti – tótenshe jaǵdaıdy eskertý bolatyn. Qazirgi tańda atalmysh aýdandardaǵy ózender men sý qoımalaryndaǵy sýdyń deńgeıi tómendeı bastady. Sol sebepti qaýipti aýdandarǵa kómekke atanǵan qutqarýshylar úılerine qaıta bastady. Jalpy, óńirde TJD men jergilikti atqarýshy organdardyń qyzmetkerleri birlesip júrgizgen jedel aldyn alý sharalary sý tasqynyn boldyrmady», - deıdi Aqmola oblysynyń TJD bastyǵy Alekseı Sovetov.
Staryı Kolýton aýylynyń turǵyny Petr Podoksenov qıyn sátte kómekke kelip, qol ushyn sozǵan qutqarýshylarǵa alǵysyn bildirýde.
«Bıylǵy qysta qar jyldaǵydan kóp jaýdy. Sol sebepti sý tasqyny oryn alyp, turǵyn úılerdi sý alyp qala ma degen qaýip boldy. Qutqarýshylarǵa alǵysymyz sheksiz. Jedel úılerdi aınala qorshaı qum salynǵan qaptarmen kómkerip, sý sorý jumystaryn júrgizdi. Sýdyń deńgeıin táýlik boıy baqylady»,- deıdi ol.
Aıta keteıik, sońǵy eki aı boıy qutqarýshylar qorǵanys bógetterin nyǵaıtyp, osal tustaryna qum salynǵan qaptar tósedi. Alǵa qoıǵan mindetterin abyroımen oryndaǵan qutqarýshylar jergilikti atqarýshy organdardyń qurmet gramottalarymen marapattaldy. Qazirgi kezde, Aqmola oblysynyń Azamattyq qorǵanystyń aýmaqtyq júıesi joǵary daıyndyq rejıminen qalypty kúıine aýysýda.
