Aqmola oblysynda sý qubyry jelileri qaıta jańartylýda
KÓKShETAÝ. QazAqparat - Aqmola oblysynda shalǵaıdaǵy eldi mekenderdiń turǵyndaryn sapaly aýyz sýmen qamtamasyz etý jumystary jalǵasýda, dep habarlaıdy QazAqparat tilshisi oblystyq ishki saıasat basqarmasyna silteme jasap.
Aqmola oblystyq Energetıka jáne turǵyn úı-kommýnaldyq sharýashylyǵy basqarmasynyń málimetinshe, «Nurly jer» baǵdarlamasy boıynsha óńirde 2025 jylǵa deıin 111 aýylda sýmen jabdyqtaý jelisin, 60 aýylda aralas blok - modýlderdi salý josparlanýda.
Birjan sal aýdanynyń Ańǵal batyr aýylynda sý qubyry jelilerin qaıta jańartý jumystary aıaqtaldy. Búginde eldi mekenniń 168 úıi men áleýmettik nysandaryna sý qubyry jelileri tartyldy.
Aýyldyq okrýg ákimi Ámına Jaqypovanyń aıtýynsha, joba ótken jyldyń mamyr-jeltoqsan aılarynda júzege asyrylǵan.
«Búginde bizdiń kentte oń ózgerister bolyp jatyr. Sýmen jabdyqtaý júıesin qaıta qurý tolyǵymen aıaqtaldy jáne barlyq úılerge sapaly aýyz sý qubyry tartyldy. Sý qubyry jelisiniń uzyndyǵy shamamen 15 shaqyrym, sý qubyry - 1946 metr. Aýyl kóshelerinde 119 qaraý qudyqtary ornatyldy, ekinshi kótermeli sorǵy stantsııasy salyndy, jalpy sıymdylyǵy 300 tekshe metr taza sýǵa arnalǵan eki rezervýar ornatyldy», - dep atap ótti okrýg ákimi.
Jergilikti turǵyndar barlyq jumystardy merziminde jáne sapaly oryndaǵan merdiger uıymǵa alǵys bildirdi.
«Biz shalǵaı aýylda turatynymyzǵa qaramastan, qaladaǵydaı jaǵdaı jasalyp otyr. Osyndaı ıgi iske úles qosqan azamattar men bıliktegi basshylarǵa alǵysymyz sheksiz», - deıdi aýyl turǵyny Indıra Joldasova.
Aıta keteıik, oblysta 2020 jyldyń qorytyndysy boıynsha 54 eldi mekende sýmen jabdyqtaý júıelerin salý jáne jóndeý boıynsha 62 joba iske asyryldy.
Oblys boıynsha bir ortalyqtandyrylǵan sýmen 380, ortalyqtandyrylmaǵan sýmen 207 eldi meken qamtylǵan.
