Aqmola oblysynda stýdenttik jataqhanalar tekserildi
Vedomstvonyń deregi boıynsha, Aqmola oblysynyń Arnaıy monıtorıng toby «AQMOLA – Adaldyq Alańy» jobalyq keńsesimen jáne «Jas Otan» jastar qanatynyń fılıalymen birlesip, sondaı-aq oblystyq máslıhat hatshysy Álibek Baımaǵambetovtyń qatysýymen Kókshetaý qalasyndaǵy joǵary tehnıkalyq kolledjdiń №2 jataqhanasyna monıtorıng júrgizdi.
«Monıtorıng barysynda óreskel zań buzýshylyqtar anyqtalǵan joq. Ǵımarattyń árbir qabatynda kir jýǵysh mashınalar, as úı jabdyqtary, tońazytqyshtar bar. Alaıda, qoǵam ókilderi jataqhanany as daıyndaý jáne tamaq ishý úshin qolaıly jaǵdaılardy qamtamasyz etý maqsatynda as úı kerek-jaraqtarymen qosymsha jabdyqtaý qajettigin atap ótti. Sondaı-aq, tabıǵı tozýyna baılanysty bólmearalyq esikterdi aýystyrý qajet.
Sonymen qatar, stýdenttik bólmelerde jeke paıdalanýǵa arnalǵan kereýet janyndaǵy týmbochkalardyń sany jetkiliksiz ekeni anyqtaldy. Jataqhanada beınebaqylaý kameralary jumys isteıdi, biraq jedel jaǵdaıdy barynsha tıimdi qadaǵalaý, tártipti saqtaý jáne stýdentterdiń qaýipsizdigin qamtamasyz etý úshin qosymsha kameralardy paıdalaný qajet», - dedi vedomstvodan.
Jataqhana basshylyǵynyń aıtýynsha, bul másele jaqyn arada sheshiledi. Stýdentterdiń qaýipsizdigine qatysty, jataqhanada kúzet beketi jumys isteıdi. Al stýdentter men kelýshilerdiń ruqsattamasy qaǵaz talondar boıynsha júrgiziletinin atap ótý kerek.
«Monıtorıng qorytyndysy boıynsha jumys toby jataqhana ákimshiligine anyqtalǵan kemshilikterdi joıý jóninde birqatar tıisti usynystar aıtty. Búgingi tańda stýdenttik jataqhanalardyń jetispeýi memleket úshin asa ózekti másele. Osy máseleni sheshý aıasynda aımaqta 2328 oryndyq 6 bilim berý uıymyna arnalǵan stýdenttik jataqhana qurylysy boıynsha daıyndyq jumystary júrgizilýde», - delingen málimette.
Bul baǵyttaǵy jumystar odan ári júıeli túrde jalǵasatyn bolady.