Aqmola oblysynda sport salasyndaǵy úzdikter marapattaldy
Oblystyq Dene shynyqtyrý jáne sport basqarmasy baspasóz qyzmetiniń málimetinshe, Aqmola oblysy óziniń sporttyq tarıhymen jáne dańqty sportshylarymen tanymal. Óńirde eleýli nátıjeler men joǵary jetistikterge qol jetkizgen ataqty chempıondar men rekordshylar tárbıelenip shyqty. «Aqmola oblysynyń sport tarlandary» oblystyq sport forýmynda eń úzdik sportshylar men jattyqtyrýshylar, oblystyq sport mekemeleriniń basshylary jáne sport jýrnalısteri ótken jyldyń qorytyndysy boıynsha Qajymuqan Muńaıtpasov atyndaǵy júldemen marapattaldy.
Shara bastalmas buryn jınalǵandar óńir sportshylarynyń jetistikteri pash etilgen kórmeni tamashalady. Sonymen qatar álemdik, halyqaralyq jáne respýblıalyq jarystarda jeńis tuǵyryna kóterilip, elimizdiń kók týyn jelbiretken aqmolalyqtar týraly beınefılm tamashalady.
Jyl qorytyndysy boıynsha «2022 jyldyń eń úzdik sportshysy» atalymyna áıelder arasyndaǵy bokstan álem chempıonatynyń kúmis júldegeri Karına Ibragımova, al «2022 jyldyń úzdik jattyqtyrýshysy» atalymyna bokstan QR eńbek sińirgen jattyqtyrýshysy Aleksandr Vysotskıı laıyq dep tanyldy.
Jeńimpazdardy Aqmola oblysynyń ákimi Ermek Marjyqpaev quttyqtap, marapattady.
«Jyl saıyn joǵary kórsetkishterge qol jetkizgen sport salasynyń ókilderin Qajymuqan Muńaıtpasov atyndaǵy syılyqpen marapattaý dástúrge aınalyp otyr. Barlyq sporttyq jetistikter qoǵamdyq uıymdardyń, jattyqtyrýshylar men sportshylardyń eren eńbegi», - dep atap ótti aımaq basshysy.
Aıta ketsek, Qajymuqan Muńaıtpasov atyndaǵy júlde men aqshalaı syılyqtar halyqaralyq jáne respýblıkalyq jarystarda jeńimpaz atanǵan 30-dan astam sportshy men sport taqyrybyn jazatyn BAQ ókilderine tapsyryldy.
Aıta keteıik, buǵan deıin Aqmola oblysynda «Bala aqyn – jas daryn» oqýshylar aıtysynyń júldegerleri marapattalǵan bolatyn.
