Aqmola oblysynda sport qalaı damytylýda
KÓKShETAÝ. QazAqparat - Aqmola oblysynda sporttyq nysandardyń ınfraqurylymyn damytýǵa erekshe kóńil bólinýde. Bul týraly óńir ákimi Málik Myrzalın oblystyq məslıhattyń sessııasynda ózine júktelgen mindetterdiń oryndalýy týraly esebinde aıtty, dep habarlaıdy QazAqparat tilshisi.
«Aǵymdaǵy jyly Esil qalasynda stadıon qalpyna keltirildi. Bulandy aýdanynda júzý basseıniniń, Kókshetaý qalasynda sportzaly bar fýtbol alańynyń qurylystary aıaqtalýǵa jaqyn. Astrahan jáne Ereımentaý aýdandarynda dene shynyqtyrý jáne saýyqtyrý keshenderi salynýda», - dedi M.Myrzalın.
Atap ótilgendeı, óńirde buqaralyq sportty damytýǵa erekshe kóńil bólinýde. Osy rette, jeńil atletıka maneji memleket menshigine qaıtarylyp otyr. Kásibı jáne buqaralyq sportty damytýda respýblıkalyq shańǵy bazasy sport kesheniniń ashylýyn aıta ketken jón. Olımpıadalyq daıarlyq ortylyǵy da Býrabaıǵa kóshirildi.
«Ótken jyly Samuryq-Qazyna» qorynyń qoldaýymen «Meniń Elim» áleýmettik-ınvestıtsııalyq baǵdarlamasy sheńberinde Arshaly jáne Tselınograd aýdandarynda kóshe sporty Street Workout, strıtbol jáne ámbebap sport alańdary ashyldy. Sonymen qatar, Stepnogor, Esil qalalarynda, Býrabaı kentinde jáne Tselınograd aýdanynyń Qajymuqan aýylynda jańa vorkýt alańdary ashylady. Mundaı ıgi ister salaýatty ómir saltyn nasıhattap, buqaralyq sportty damytýda mańyzdy bolmaq», - dedi aımaq basshysy.
Oblys aýmaǵynda 2355 sport nysany tirkelgen bolsa, onyń 70 paıyzy aýyldyq eldimekenderde ornalasqan.
