Aqmola oblysynda soǵys ardageriniń elektrondy kitaby tanystyryldy
KÓKShETAÝ. QazAqparat - Aqmola oblysynda tanymal saıası jáne qoǵam qaıratkeri, Uly Otan soǵysynyń ardageri Baıan Janǵalovtyń «Úsh kezeń» («Trı perıoda» ) kitabynyń elektrondy nusqasynyń tusaý keseri ótti, dep habarlaıdy «QazAqparat» HAA tilshisi aýdan əkiminiń baspasóz qyzmetine silteme jasap.
Zerendi aýdandyq kitaphanasynda ótken sharaǵa aýdan əkimi Asqar Muratuly qatysyp, týyndy týraly óziniń jyly pikirin bildirdi.
Atalǵan kitap osydan 13 jyl buryn jaryq kórgen. Onda avtor óziniń balalyq shaǵy, ata-anasy jəne olardan boıyna sińirgen tárbıesi týraly aıtylady. Jalpy, kitap sol kezdegi oqıǵalar shynaıy sýrettelgen «Nachalo jıznı», «Zvezdnoe vremıa», «Posvıaşenıe býdýşemý pokolenııý» tárizdi úsh bólimnen turady.
Shara barysynda ardagerdiń uly Muratbek Janǵalov, eńbek ardagerleri Muhıt Qabdeshev, Oljabaı Nurǵalıev, Svetlana Halıleva Baıan atanyń ómiri men ómir joldary jəne onymen tiri kezinde birge qyzmettes bolǵan sátterin eske aldy.
Eske sala keteıik, Baıan Janǵalov uzaq ta ǵıbratty ǵumyr keshti. Uly Otan soǵysynyń qan maıdanyna qatysyp, elimizdi jaýdan erlikpen qorǵady. Túrli memlekettik jaýapty ári basshylyq qyzmetterdi zor abyroımen atqaryp, uıymdastyrýshylyq darynymen, joǵary adamgershilik qasıetterimen tanyldy. Eren eńbektiń úlgisin kórsetip, úlken abyroı men bedelge, memlekettiń eń joǵary marapattaryna ıe boldy. Sotsıalıstik Eńbek Eri, Qazaq KSR Joǵarǵy Keńesiniń depýtaty, eki márte Lenın, Eńbek Qyzyl Tý, Qyzyl Juldyz, І-dárejeli Otan soǵysy ordenderimen marapattaldy. Dúnıeden ótkenshe árdaıym halqymyzdy yntymaq pen birlikke shaqyryp júrdi. 2013 jyldyń 30 qańtarynda kórnekti memleket jáne qoǵam qaıratkeri, Uly Otan soǵysynyń ardageri, Sotsıalıstik Eńbek Eri, Aqmola oblysynyń qurmetti azamaty Baıan Janǵaluly 99 jasqa qaraǵan shaǵynda dúnıeden ozdy.
Baıan Janǵalov Aqmola oblysy Zerendi aýdany Jamantuz aýylynda 1914 jyldyń 15 shildesinde dúnıege kelgen. 1952 jyly Almaty qalasyndaǵy Ortalyq komıtet janyndaǵy joǵary partııa mektebin bitirdi. Eńbek jolyn 1931 jyly aýyldyq keńes hatshylyǵynan bastady. Uly Otan soǵysy jyldary Panfılov atyndaǵy 8-shi gvardııalyq dıvızııanyń quramynda Stalıngrad, Harkov, Kýrsk, Baltyq maıdandarynda shaıqastarǵa qatysty. Baıan Janǵalulynyń munan keıingi ómiri týǵan jeri Kókshetaý topyraǵyndaǵy partııalyq-sharýashylyq jumyspen tyǵyz baılanysty boldy. 1956 jyly Rýzaev aýdandyq atqarý komıteti tóraǵasy qyzmetinde eńbektenip júrgende, oǵan Sotsıalıstik Eńbek Eri ataǵy berildi. Osy marapat Rýzaev aýdanynyń memleketke 35 mıllıon put astyq tapsyrǵan jemisti eńbeginiń nátıjesi edi. Bul kórsetkish KSRO-da ekinshi, al Qazaqstanda - birinshi bolatyn.
