Aqmola oblysynda «soǵymǵa daıyndyq» jobasy júzege asyryla bastady

Jobaǵa Aqmola oblysynyń Tselınograd aýdanynda azyq-túlik, turmystyq zattar jáne mal satylatyn ámbebap «Altyn taǵa» bazarynyń basshylyǵy atsalysýda.

Astananyń irgesindegi Qosshy aýylynyń mańynda ornalasqan «Altyn taǵa» saýda kesheniniń aýmaǵy 1 650 sharshy metrdi quraıdy. Onda tek saýda pavılondary ǵana emes, veterınarlyq zerthana, qasaphana, shujyq tsehy, tońazytqysh kamerasy, kókónis jáne jemis-jıdek qoımasy bar. Oǵan qosa, semirtiletin maldy qamap ustaıtyn 15 ashyq mal qorasy da qarastyrylǵan. 

Qazirdiń ózinde 3000 qoı-eshki, 1000 bas iri qara men 200 jylqy túligi bordaqylanýda.

 

Mal bazarynyń basshysy  Aıdar Nyǵmetovtyń aıtýynsha, «Altyn taǵa» bazarynda kókónis, jemis-jıdek, et jáne et ónimderi, balyq, sút jáne sút ónimderi, arpa, turmystyq hımııa jáne kúndelikti tutynatyn taýarlar satylady. Shujyq tsehynda et ónimderiniń súrlengen, jartylaı súrlengen tárizdi 50 túri shyǵarylady. Tsehtyń qýaty táýligine 2 tonna et ónimderin quraıdy. Sondaı-aq, kókónis jáne jemis-jıdek qoımasynda 1 000 tonn ónim saqtaýǵa bolady. Qoımanyń ishi salqyndatqysh, belgili bir aýa temperatýrasyn ustap turý úshin qajetti qondyrǵylarmen jabdyqtalǵan. Oǵan qosa, saýda ornynda syrttan kelgen saýdagerler úshin 120 adamǵa jataqhana, 100 oryndyq ashana jáne 200 kólikke arnalǵan avtoturaq qarastyrylǵan. «Altyn taǵa» bazary tas joldyń boıynda ornalasqandyqtan ári beınebaqylaý kamerasymen jabdyqtalǵandyqtan aýyl shaýashylyǵy taýarlaryn óndirýshiler úshin óte qolaıly. Osy saýda orny arqyly elorda turǵyndary men astanalyq eldi mekenderdegi halyq sapaly ári ekologııalyq taza aýyl sharýashylyǵy ónimderin tutynýda.

«Altyn taǵa» oblysta alǵashqylardyń biri bolyp "Soǵymǵa daıyndyq" jobasyna qatysýda. Astanalyqtar endi osynda daıyn semirtilgen,  veterınarlyq tekseristen ótken əri naryq baǵasynan arzanyraq soǵym satyp ala alady», deıdi mal bazarynyń basshysy Aıdar Nyǵmetov.