Aqmola oblysynda skarlatına men jelsheshek aýrýynyń ósýi tirkeldi

KÓKShETAÝ. QazAqparat - Aqmola oblysynda jyl basynan beri sirespe, dıfterııa, qyzamyq, qyzylsha, polıomıelıt, epıdemııalyq parotıt, kókjótel sııaqty ınfektsııalar tirkelgen joq. Alaıda dárigerlerdi aımaqtaǵy balalardy josparly vaktsınatsııalaýdan bas tartý sany 1,9 paıyzǵa artqany alańdatyp otyr. Bul týraly brıfıngte Aqmola oblysynyń bas memlekettik sanıtarlyq dárigeri Aınagúl Mýsına málim etti, dep habarlaıdy QazAqparat tilshisi.

Onyń aıtýynsha, Aqmola oblysyndaǵy epıdemıologııalyq jaǵdaı turaqty. Bıylǵy jyldyń basynan asa qaýipti ınfektsııalar, sondaı-aq sirespe, dıfterııa, qyzamyq, qyzylsha, polıomıelıt, epıdemııalyq parotıt, kókjótel sııaqty vaktsınamen basqarylatyn ınfektsııalar tirkelgen joq. Oblysta menıngokokk ınfektsııasymen syrqattanýshylyq turaqty retinde sıpattalady, ótken jyldaǵydaı eki jaǵdaı tirkelgen.

«Jaǵdaı Sandyqtaý aýdanynda eki jastaǵy balada jáne Tselınograd aýdanynda 46 jastaǵy eresek adamda tirkelgen», - dedi A.Mýsına.

2021 jyly skarlatına aýrýynyń 2,2 ese tómendegeni baıqaldy, 38 jaǵdaı tirkeldi. Alaıda, 2022 jyldyń basynan beri aýrýdyń segiz jaǵdaıy tirkeldi, ıaǵnı ótken jyldyń sáıkes kezeńimen salystyrǵanda tórt ese ósý baıqalady.

«2021 jyly jelsheshekpen syrqattanýshylyqtyń 1,1 esege tómendegeni baıqaldy, ıaǵnı 928 jaǵdaı tirkeldi. Bıylǵy jyldyń basynan beri ótken jyldyń sáıkes kezeńimen salystyrǵanda 7,7 ese ósim baıqalyp, 216 jaǵdaı tirkeldi», - dep túıindedi óńirdiń bas memlekettik sanıtarlyq dárigeri.