Aqmola oblysynda ShOB salasynda 7 myń jumys orny ashyldy
KÓKShETAÝ. QazAqparat - Aqmola oblysynda shaǵyn jáne orta bıznes salasynda 7 myń jumys orny ashyldy. Bul týraly aımaq basshysy Málik Myrzalın turǵyndar aldyndaǵy esepti kezdesýinde aıtty, dep habarlaıdy QazAqparat tilshisi oblystyq ishki saıasat basqarmasyna silteme jasap.
Jıynda aıtylǵandaı, óńirde shaǵyn jáne orta bıznesti qoldaý maqsatynda memleketten 7 mıllıard teńge bólindi. Osy arqyly 353 joba qoldaý taýyp, 923 shaǵyn nesıe (2017 jylmen salystyrǵanda 2 esege kóp) berildi.
Aımaq basshysynyń sózinshe, óńirde shaǵyn jáne orta bıznes salasynda 7 myń jumys orny ashyldy. Budan bólek, ónim kólemi 8,6 paıyzǵa ulǵaıyp, 272 mıllıard teńgege jáne salyq túsimi 37 mıllıard teńgege jetti.
«Memleket basshysy el ekonomıkasynda shaǵyn jáne orta bıznestiń úlesin arttyrý týraly bizdiń aldymyzǵa úlken mindetter qoıyp otyr. Máselen, 2017 jyly onyń úlesi 25,1 paıyz bolsa, jyl sońyna deıin 28,2 paıyzǵa, 2025 jyly 35 paıyzǵa jetkizý qajet. Bul zor mindet. Maǵan jáne meniń áriptesterime bul máselemen tyńǵylyqty aınalysý kerek», - dep atap ótti aımaq basshysy.
