Aqmola oblysynda sheteldik avtokólikterdi ýaqytsha tirkeý tártibi túsindirildi
KÓKShETAÝ. QazAparat – Aqmola oblysynda Eýrazııalyq ekonomıkalyq odaq (EAEO) elderinen ákelingen avtokólikterdiń ıelerine kólik quraldaryn ýaqytsha tirkeý tártibi túsindirildi, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Vedomstvonyń málimetinshe, bir kúnniń ishinde Reseı, Armenııa. Belarýs jáne Qyrǵyzstannan ákelingen 30-ǵa jýyq avtokóliktiń ıesine polıtsııa qyzmetkerleri kólik quralaryn tirkeýge qatysty aqyl-keńes berdi.
«Aqpannyń 1-nen bastap, Kókshetaý qalalyq mamandandyrylǵan HQO, ákimshilik polıtsııa basqarmasy men Memlekettik kirister departamentiniń qyzmetkerleri avtokólik ıelerine kólik quraldaryn ýaqytsha nemese turaqty tirkeýge qoıý joldaryn túsindirdi. Sonymen qatar, oblys ortalyǵynnan bólek, Stepnogor, Aqkól, Şýchınsk, Esil, Atbasar jáne Derjavınsk sııaqty óńirdegi iri qalalarda da túsindirý jumystary júrgizilýde», - deıdi vedomstvodan.
Polıtseılerdiń málimetinshe, aldaǵy úsh aı boıy oblys ortalyǵyndaǵy jáne aýdandar men qalalardaǵy mamandandyrylǵan HQO demalyssyz jumys isteıtin bolady.
«Sheteldik avtokólikterdiń ıelerine kólik quraldaryn tirkeý úshin jeke kýálik, burynǵy memlekettik jáne tranzıttik nómir belgisi, tirkelgendigi týraly qujat, jeke menshiktigin rastaıtyn qujat, bastapqy tirkeý tólemderiniń, memlekettik nómir men tehnıkalyq qujatty ázirleý úshin tólengen salyqtyń túbirtegi qajet.
Ýaqytsha tirkelgennen keıin qazaqstandyqtar bir jyl ishinde qaldyqtardy óńdeý jınaǵy jáne kedendik salyq tólemderin jasaı alady. Kólik ıelerine 18 sany bar arnaıy sary tústi memlekettik nómir beriledi, tehnıkalyq qujatta tıisti belgi qoıylady», - dep túsindirdi vedomstvodan.
Aıta keteıik, Aqmola oblysynyń ákimshilik polıtsııa basqarmasynda arnaıy Call-ortalyq ashyldy. Onda azamattar EAEO elderinen ákelingen avtokólikterge qatysty 8-716-2-29-98-37 arqyly bile alady.
Sonymen qatar, Aqmola oblysynyń ákimshilik polıtsııa basqarmasynyń aǵa ınspektory, polıtsııa maıory Vladımır Býkreevke 87771000102 nómiri jáne aǵa memlekettik ınspektor, polıtsııa maıory Aslan Buqanovqa 87077811176 nómiri arqyly habarlasýyna bolady.
EAEO elderinen ákelingen avtokólikterdi ýaqytsha tirkeý 2021 jyldyń 1 naýryzyna deıin jalǵasady.
