Aqmola oblysynda Servıstik ákimdik ashyldy
KÓKShETAÝ. QazAqparat - «Halyq únine qulaq asatyn memleket» tujyrymdamasyn iske asyrý sheńberinde, sondaı-aq halyqpen kommýnıkatsııanyń tıimdiligin arttyrý jáne azamattar úshin ashyqtyq pen qoljetimdilikti qamtamasyz etý maqsatynda Aqmola oblysynyń Atbasar aýdanynda Servıstik ákimdik ashyldy.
Bul týraly QazAqparat tilshisi Sybaılas jemqorlyqqa qarsy is -qımyl agenttigi Aqmola oblysy boıynsha departamentiniń baspasóz qyzmetine silteme jasap habarlaıdy.
Vedomstvonyń málimetinshe, bul jumys aýdan ákiminiń apparatynda uıymdastyrylǵan jáne bir jerde azamattardy qabyldaý, ótinishterdi jedel qaraý, sondaı-aq keńes berýge arnalǵan.
«Ashyq ákimdik memlekettik organdardaǵy Open-space jáne Front office jumysynyń tıimdi úılesimi bolyp tabylady. Onyń ajyramas bóligi - qyzmetkerlerdiń tartylýyna negizdelgen joǵary uıymdastyrý mádenıetiniń bolýy.
Servıstik ákimdikte aýyl sharýashylyǵy, jer qatynastary, sáýlet jáne qala qurylysy, memlekettik qyzmetter, turǵyn úı-kommýnaldyq qyzmetter, jolaýshylar kóligi, avtomobıl joldary jáne turǵyn úı ınspektsııasy bólimderiniń, sondaı-aq Turǵyn úı qurylys jınaq bankiniń qyzmetkerleri óz qyzmetin júzege asyrady», - deıdi vedomstvodan.
Sonymen qatar, tótenshe jaǵdaı rejımi kezinde azamattardy qabyldaý jáne konsýltatsııalar ótkizý onlaın rejımde júrgiziletinin atap ótken jón.
Aıta ketý kerek, oblystyń birqatar aımaǵynda osyǵan uqsas Servıstik ákimdikter jumys isteıdi. Aldaǵy ýaqytta bul tájirıbeni taratý basqa aýdandar da júzege asyratyn bolady.
