Aqmola oblysynda sanıtarlyq tazalyq boıynsha aılyq ótpek
KÓKShETAÝ. QazAqparat - Aqmola oblysynda 17-20 sáýir aralyǵynda eldi mekenderdi kórkeıtý, sanıtarlyq tazalyq, abattandyrý jáne kógaldandyrý boıynsha dástúrli aılyq ótedi. Bul týraly óńirlik kommýnıkatsııalar qyzmetinde ótken brıfıngte oblystyq energetıka jáne turǵyn úı-kommýnaldyq sharýashylyǵy basqarmasynyń basshysy Tımýr Hamzın málim etti, dep habarlaıdy «QazAqparat» HAA tilshisi.
Eske sala keteıik, jaqynda aımaq basshysy Málik Myrzalın oblystyq máslıhattyń hatshysy Dýlat Nurmoldın, oblys ákiminiń orynbasarlary, oblys ákiminiń apparaty, jaýapty qyzmetkerleri, oblystyq departamentter men basqarma basshylarynyń qatysýymen ótken apparat májilisinde jyl saıyn kóktem mezgilinde uıymdastyrylatyn eldi mekenderdi kórkeıtý, sanıtarlyq tazalyq, abattandyrý jáne kógaldandyrý boıynsha aılyq ótkizý týraly tapsyrma bergen bolatyn.
Osyǵan oraı oblystyq energetıka jáne turǵyn úı-kommýnaldyq sharýashylyǵy basqarmasy jumys josparyn jasap otyr.
«Biz aılyqty ótkizý úshin oblystaǵy aýdandar men qala ákimdikterine jáne tıisti organdarǵa arnaıy hat joldadyq», dedi basqarma basshysy Tımýr Hamzın.
Brıfıngte aıtylǵandaı oblystaǵy aýdandar men qala ákimderine sanıtarlyq tazalyq aılyǵyn ótkizýdiń josparyn jasap, ony qamtamasyz etý tapsyrylyp otyr. Ásirese, aılyqqa turǵyndardy, qoǵamdyq birlestikerdi jáne kommertsııalyq qurylymdardy tarta otyryp, eldi mekenderdi kórkeıtý, sanıtarlyq tazalyq, abattandyrý jáne kógaldandyrý maqsatynda keń kólemde úgit-nasıhat jumystaryn uıymdastyrý usynylýda.
«Sharany josparlaý barysynda aýdan jáne qala ákimderi 7 mamyrǵa deıin qolǵa alynatyn jumystardy anyqtap, júzege asyrýy qajet. Naqtyraq aıtsaq, eldi mekenderden shyǵa beris joldardy, eskertkishter men saıabaqtardy, alleıalardy jáne Jeńis kúnine arnalǵan saltanatty sharany ótkizetin oryndar men alańdardy qoqystan tazartyp, retke keltirý boıynsha jumystar birinshi kezekte qolǵa alynýy tıis», dedi Tımýr Hamzın.
Sonymen qatar, brıfıngte basqarma tarapynan ótken jyly atqarylǵan jumystardyń qorytyndysy shyǵaryldy.
Oblys boıynsha 2016 jyly kóktem jáne kúz mezgilderinde arnaıy orny belgilengen 780 kúl-qoqys alańy anyqtalyp, 200 myń tekshe metrden astam qoqys tazartyldy. Barlyǵy 624 skver men saıabaq tazalanyp, ıesiz qalǵan 182 ǵımarat buzyldy. Sondaı-aq, 114 myńnan astam aǵash otyrǵyzyldy. Shara barysynda aqyly jumystarǵa tartylǵan 2200 astam adam men kommýnaldyq qyzmetter, páter ıeleri kooperatıvteri, qoǵamdyq jáne kommertsııalyq uıym ókilderi, JOO stýdentteri, kolledjder men mektep oqýshylary jáne eriktilerdiń qatysýymen «Taza meken» jáne «Aǵash otyrǵyz» aktsııalary uıymdastyryldy.
