Aqmola oblysynda Saǵadat Nurmaǵambetovti eske alý sharasy ótti

KÓKShETAÝ. QazAqparat - Táýelsizdiktiń 30 jyldyǵyn merekeleý aıasynda Aqkól qalasynda Sovet Odaǵynyń Batyry, Halyq Qaharmany Saǵadat Nurmaǵambetovtyń eskertkishine gúl shoqtaryn qoıý saltanatty rásimi ótti, dep habarlaıdy QazAqparat tilshisi Aqmola oblysynyń ishki saıasat basqarmasyna silteme jasap.

Aty ańyzǵa aınalǵan generaldyń ómir joly – kóptegen áskerı qyzmetshiler úshin batyldyq pen Otanǵa degen sheksiz berilgendiktiń úlgisi. Táýelsiz Qazaqstannyń tuńǵysh qorǵanys mınıstrin eske alýǵa onyń týystary, dostary, áriptesteri, QR Qarýly kúshteriniń ardagerleri, «Jas sarbaz «balalar-jasóspirimder áskerı-patrıottyq qozǵalysy» respýblıkalyq qoǵamdyq birlestiginiń ókilderi qatysty.

Aýdan ákimdiginiń baspasóz qyzmeti atap ótkendeı, qatysýshylar Saǵadat Nurmaǵambetov memorıalyna gúl shoqtaryn qoıyp, bir mınýt únsizdikpen eske aldy.

«Ár halyqtyń tarıhynda dáýirdi anyqtaıtyn, birneshe urpaq úshin búkil ulttyń maqtanyshyn beıneleıtin adamdar bar. Bizdiń aty ańyzǵa aınalǵan jerlesimiz, Keńes Odaǵynyń Batyry, №1 Halyq Qaharmany Saǵadat Nurmaǵambetov dál osyndaı adam. Búgin ol 97 jasqa tolar edi. Bizdiń armııamyzda erligi men áskerı eńbegi, egemen Qazaqstannyń Qarýly kúshterin qurýǵa qosqan eleýli úlesi jáne orasan qoǵamdyq qyzmeti birneshe urpaqtyń ókilderi baǵalaıtyn basqa adamdy tabý qıyn», - dedi aýdan ákimi Alpysbaı Qaıyrjanov mıtıngti ashqan kezde.

Sharaǵa qatysqandar Saǵadat Nurmaǵambetovtyń Táýelsiz Qazaqstan armııasynyń qalyptasýy men damýyna qosqan baǵa jetpes úlesin atap ótti.

Aıta keteıik, Aqkól aýdanyndaǵy №1 balalar úıiniń bazasynda «Jas sarbaz» klýby ashyldy, onyń 20 tárbıelenýshisi saltanatty túrde áskerı-patrıottyq qozǵalys qataryn tolyqtyrdy.