Aqmola oblysynda «Rýhanı jańǵyrý» saıabaǵy ashyldy

KÓKShETAÝ. QazAqparat - Aqmola oblysynyń Tselınograd aýdanynda QR Memlekettik rámizderi kúni Astana qalasynyń 20 jyldyǵy men Tselınograd aýdanynyń 90 jyldyǵyn merekeleý aıasynda «Rýhanı jańǵyrý» mádenı-demalys saıabaǵy ashyldy, dep habarlaıdy QazAqparat tilshisi oblystyq ishki saıasat basqarmasyna silteme jasap.

Aqmola selosynda ashylǵan «Rýhanı jańǵyrý» mádenı-demalys ortalyǵy zamanaýı art-elementtermen jabdyqtalǵan. Aýmaǵy 3,5 gektardy quraıdy.  Aınalasyna aq qaıyń, jasyl shyrsha, alma aǵashy, qaraǵashtyń kóshetteri otyrǵyzylyp, kógaldandyrylǵan. Bıiktigi 18 metrdi quraıtyn flagshtok, shved sahnasy, sýburqaq, taıqazan, qobyz, kıiz úıdiń úlgileri qoıylǵan.  Aýdan turǵyndary men qonaqtaryna jáne balalarǵa serýendep, demalýyna barlyq jaǵdaı jasalǵan.

Merekelik shara 44813 áskerı bóliminiń jeke quramy memleketik rámizder - Tý, Eltańba men Ánurandy alyp shyǵyp, QR Memlekettik Týyn kóterýmen jalǵasyn tapty. Tý kóterý quqyǵy atalmysh bólimniń áskerı memlekettik quqyqtyq daıyndyǵynyń ozaty, kapıtan Serik Shegebaevqa berildi.

Saıabaqtyń ashylý saltanatyna aımaq basshysy Málik Myrzalın qatysyp, quttyqtaý sóz sóıledi.

«Elbasy Nursultan Nazarbaev óziniń sózinde biz táýelsizdikke qol jetkizdik. Endi memlekettiń Týy, Eltańbasy, Ánurany tárizdi basty qasıetti belgilerin erekshe qadirleýimiz qajet. Biz úshin memlekettik rámizder ulttyq tutastyqtyń kepili. El irgesi berik, zamanymyz tynysh bolyp, elimiz damı bersin. Aýdannyń 90 jyldyq mereıtoıy qarsańynda ashylǵan jańa saıabaq Tselınograd aýdanynyń turǵyndaryna tamasha tartý. Máńgilik eldiń týy bıikten kórinsin», - dedi M.Myrzalın.