Aqmola oblysynda respýblıkalyq mańyzy bar jol jóndelip jatyr

KÓKShETAÝ. QazAqparat - Aqmola oblysynyń Jarqaıyń aýdanynda kópten kútken jol jóndeý jumystary bastalyp ketti. Oǵan respýblıkalyq bıýdjetten alǵashqy transh - 800 mln teńgeden astam qarajat bólingen, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.  

Jarqaıyń aýdanynyń aýmaǵynan ótetin «Jezqazǵan-Petropavl» respýblıkalyq jolynyń jóndelmegenine kóp jyldar bolǵan. Sońǵy birneshe jylda aýdan ákimshiligi osy jol ýchaskesin jańartý úshin qoldan kelgenniń bárin jasady.

«Shilde aıynyń basynda «Jezqazǵan-Petropavl» respýblıkalyq mańyzy bar avtojolynyń 32-shaqyrymdyq aýmaǵyn jańartý jumysy bastalyp ketti. Qazirgi tańda merdiger uıym Tasty-Taldy aýylynda asfalt zaýytyn salyp jatyr. Jańadala aýyldyq okrýginiń terrıtorııasyna barlyq qajetti arnaıy tehnıka jetkizildi», - dep málimdedi vedomstvo ókilderi.

Joba aıasynda 16 aýyl turǵyny jumyspen qamtylǵan. Birinshi satyda jol jóndeýshiler Tasty-Taldy aýylynan Qostanaı oblysy shekarasyna deıingi aýmaqty jóndeýden ótkizedi. Ekinshi satyda jumys Ýálıhan aýyldyq okrýgimen shektesetin núktege deıin jalǵasady.

Merdiger uıym jóndeý jumystaryn aǵymdaǵy jyldyń qazan aıynda tolyq aıaqtaıdy dep josparlanyp otyr.