Aqmola oblysynda psıhotroptyq zattardy saýdalaǵan eki stýdent 10 jylǵa sottaldy
Vedomstvonyń málimetinshe, qylmystyq is Aqmola oblysynyń qylmystyq ister jónindegi mamandandyrylǵan aýdanaralyq sotynda qaraldy. Sotta anyqtalǵandaı, SQO turǵyndary «M.» jáne «E.» Aqmola oblysy aýmaǵynda psıhotroptyq zattardyń zańsyz aınalymyna baılanysty asa aýyr qylmys jasaǵan (Qylmystyq kodeksiniń 297-baby 3-bóliginiń 1),3),5) tarmaqshalary).
«Eki stýdent aqsha tapqysy kelip, ınternet jelisinde basqa adammen qylmystyq kelisimge keldi. Ol stýdentterge psıhotroptyq zat «mefedrondy» taratý boıynsha kepilger jumysyn usynǵan. Berilgen mekenjaı boıynsha sottalýshylar orman ishinde jasyrynǵan «mefedrondy» alyp, qalaǵa kele jatqan kezde polıtsııa qyzmetkerleri ustady. Tintý kezinde olarda satý úshin alynǵan 21 dana jıyntyq tabyldy», - dedi vedomstvodan.
Vedomstvonyń baspasóz qyzmetinen atap ótkendeı, sottalýshylardyń kinási kýágerler men sottalýshylardyń aıǵaqtarymen, jeke tintý hattamasymen, sarapshynyń qorytyndysymen, basqa adammen kepilger jumysynyń máni týraly hat almasýdyń hronologııasy anyqtalǵan uıaly telefondardy tekserý hattamasymen rastaldy.
«Bul qylmysqa qatysy bar basqa adamǵa qatysty materıaldar jeke óndiriske bólingen. Osylaısha, «M.» jáne «E.» elektrondyq aqparattyq resýrstardy paıdalana otyryp, adamdar tobynda aldyn ala sóz baılasý boıynsha asa iri mólsherde psıhotroptyq zatty zańsyz satyp alyp, ótkizý maqsatynda saqtaǵan. Sot, qylmystyq jaýaptylyq pen jazany jeńildetetin mán-jaılardy: turǵylyqty jeri men oqýy boıynsha oń sıpattama, alǵash ret qylmystyq jaýapkershilikke tartylýy, jas bolýy (19 jas), aýyrlatatyn mán-jaılardyń bolmaýy, olar jasaǵan asa aýyr qylmystyń sıpaty men qoǵamdyq qaýiptiliktiń joǵary dárejesin eskere otyryp, árqaısysyna 10 jylǵa bas bostandyǵynan aıyrýdy taǵaıyndady», - dedi vedomstvodan.
Úkim zańdy kúshine engen joq.
Aıta ketsek, budan buryn Kókshetaýda kásipkerden aqsha talap etken tótenshe jaǵdaı qyzmetkerleri sottalǵanyn jazǵan edik.
