Aqmola oblysynda prokýratýranyń aralasýynan keıin 127 mln eýro turatyn keshen iske qosyldy

Aqmola oblysynyń prokýrory Aıdos Maılybaev iri kásipkerlermen jáne ınvestorlarmen kezdesýde kásipkerlerdi qoldaý jáne prokýratýra organdarymen súıemeldeýdi qajet etetin ınvestıtsııalyq jobalar týraly aıtty, dep habarlaıdy QazAqparat QR Bas prokýratýrasynyń baspasóz qyzmetine silteme jasap.

Máselen, prokýror Aqmola oblysynda aberdın-angýs sıyrlaryn bordaqylaıtyn keshen qurylysyn salý jobasyn júzege asyrý kezinde oblys ekonomıkasyna 127 mıllıon eýrodan astam ınvestıtsııa quıýdy josparlaǵan ınvestordyń qandaı kedergilerge tap bolǵanyn habarlady.

Qurylys bastaýǵa qajet jer ýchaskelerin jáne ruqsat qujattaryn ala almaýynan, ınvestıtsııalyq jobany júzege asyrý 3 jylǵa jýyq sozylyp, tek prokýratýranyń aralasýynan keıin ǵana 2 aıdyń ishinde ınvestorlar óz jumysyn bastady.

«Tapsyrma bar, mindetter qoıyldy, prokýratýra tarapynan ınvestıtsııalyq jobalardy súıemeldeý jalǵastyrylatyn bolady. Qazirgi kezdesýdiń basty maqsaty - memlekettik apparattyń bıznes qoǵamdastyqpen senimdi ózara is-qımylyn qalyptastyrý», - dedi oblys prokýrory.

Óz kezeginde jıynǵa qatysqan ınvestorlar bıznes-ahýaldyń jaqsarǵanyna toqtalyp, óńirdegi ınvestıtsııalyq jobalardy qalypty júzege asyrýǵa kedergi keltirip otyrǵan birqatar máselelerdi atap ótti.

Kásipkerlik sýbektilerin qylmystyq qýdalaý orbıtasyna tartý jáne Memleket basshysy aǵymdaǵy jyldyń 12 qyrkúıeginde bıznes ókilderimen ótken keńeste aıtqan «kinásizdik prezýmptsııasyn» saqtaý máseleleri talqylandy.

Árbir kóterilgen másele oblys prokýratýrasy janynan jumys isteıtin Front-ofıstiń qyzmeti aıasynda sheshiletini atap ótildi.

Kezdesýge oblys ákiminiń orynbasary, Atameken kásipkerler palatasynyń dırektory, «Qazaqınvest» AQ óńirlik dırektory, Aqmola oblysy boıynsha Quqyqtyq statıstıka jáne arnaıy esepke alý Komıteti Departamentiniń bastyǵy, sondaı-aq oblystyń quqyq qorǵaý organdarynyń basshylary qatysty.

Shaqyrylǵan ınvestorlar osyndaı formatta ótkizilgen kezdesýdi jáne osyndaı suhbat alańynda ózekti máselelerdi talqylaý múmkindigin oń qabyldady.