Aqmola oblysynda polıtsııa departamentiniń laýazymdy tulǵalary ustaldy

KÓKShETAÝ. QazAqparat - Laýazymdyq ókilettigin asyra paıdalanǵan Aqmola oblysy polıtsııa departamentiniń joǵary laýazymdy tulǵalary ustaldy, dep habarlaıdy QazAqparat tilshisi Ulttyq qaýipsizdik komıteti Aqmola oblysy boıynsha departamentiniń baspasóz qyzmetine silteme jasap.

Vedomstvonyń málimetinshe, UQK Aqmola oblysy boıynsha departamenti men QR ІІM ózindik qaýipsizdik basqarmasy birlesip, Kókshetaý qalasynda arnaıy operatsııa júrgizgen.

Onyń barysynda Aqmola oblysy PD krımınaldyq polıtsııa basqarmasynyń bastyǵy jáne osy basqarmanyń qylmystyq toptarmen aınalysatyn bóliminiń aǵa jedel ýákili qolǵa tústi.

Olarǵa materıaldyq paıda alý maqsatynda laýazymdyq ókilettigin asyra paıdalandy degen aıyp taǵylyp otyr.

«Júrgizilgen tintý is-sharalary barysynda ustalǵandardan tergelip jatqan iske qatysy bar aqsha qarajaty alyndy. Kúdiktilerge qatysty kúzetpen ustaý bultartpaý sharasy tańdaldy. QR QK 361-babynyń 2-1-bóligi, 362-babynyń 4-bóligi boıynsha sotqa deıingi tergeý júrgizilip jatyr», - dedi vedomstvonyń baspasóz qyzmetinen.