Aqmola oblysynda polıtsııa bólimi bastyǵynyń orynbasaryna izdeý jarııalandy

KÓKShETAÝ. QazAqparat - Aqmola oblysynda iz-túzsiz joǵalǵan Zerendi aýdandyq polıtsııa bólimi bastyǵynyń orynbasary Turar Turaruly Dúısembınge izdeý jarııalandy, dep habarlaıdy QazAqparat tilshisi.

Oblystyq Polıtsııa departamenti baspasóz qyzmetiniń málimetinshe, T.T. Dúısembınniń habar-osharsyz ketkendigi týraly 23 maýsymda Kókshetaý polıtsııa basqarmasyna ótinish túsken. Áıeliniń sózinshe, Turar Dúısembın 20 maýsymda úıden shyǵyp, sol kúıi habarsyz ketken. PD baspasóz qyzmetindegiler T.T. Dúısembın qazirgi ýaqytta buıryqqa sáıkes kezekti eńbek demalysynda ekenin aıtady.

«Ótinish túskennen keıin birden polıtsııa departamenti keshendi izdestirý is-sharalaryn uıymdastyrdy, Zerendi aýdany Polıtsııa bólimi, Kókshetaý qalalyq Polıtsııa bólimi, Polıtsııa departamentiniń jeke quramy, sondaı-aq, áskerı qyzmetshiler men eriktiler jumyldyryldy», - deıdi vedomstvodan.

Osy rette, Polıtsııa qyzmetkerleri T.T. Dúısembınniń ornalasqan jeri týraly qandaı da bir aqparat ıe adam bolsa, dereý quqyq qorǵaý organdaryna habarlaýdy suraıdy.

Aıta ketsek, budan buryn Aqmola oblysynda iz-túzsiz joǵalǵan oqýshy qyzdar izdestirilip jatqandyǵyn jazǵan edik.