Aqmola oblysynda polıtsııa 9 saǵat jolda qalǵan qostanaılyqtarǵa kómektesti
KÓKShETAÝ. QazAqparat – Aqmola oblysynyń polıtsııasy jolda qalǵan Qostanaı oblysynyń turǵyndaryna kómek kórsetti, dep habarlaıdy QazAqparat tilshisi Aqmola oblystyq Polıtsııa departamentiniń baspasóz qyzmetine silteme jasap.
Vedomstvonyń málimetinshe, qatty aıaz ben temperatýranyń tómendeýine baılanysty óńirdiń tártip saqshylary apta boıy avtomobıl joldarynda kezekshilik etip, jolda qalǵan júrgizýshiler men jolaýshylarǵa kómek qolyn sozýda.
«Sondaı jaǵdaıdyń biri, qańtardyń 16-da tirkeldi. Onda Nur-Sultannan Qostanaıǵa baǵyt alǵan «KamAZ» júk kóligi «Jaqsy-Esil-Buzylyq» avtojolynyń 7-shi shaqyrymynda isten shyqqan. Kólik júrgizýshisi men jolaýshysy toǵyz saǵat boıy kómek kútken. Jolaı ótip bara jatqan kólikter toqtamaǵan», - dedi vedomstvodan.
Osy kezde, Aqmola oblysy Polıtsııa departamentiniń patrýldik polıtsııa batalony qyzmetiniń ınspektorlary polıtsııa leıtenanty Qýanysh Toltanov pen Mırat Sháıimov jol shetinde toqtap turǵan kólikti kórip, kómekke kelgen. Anyqtalǵandaı kóliktiń akkýmlıatory isten shyqqan eken. Sol sebepti, tártip saqshylary jolda ótip bara jatqan ózge júk kóligin toqtatyp, synǵan «KamAZ» kóligin dittegen jerine súırep jetkizýge kómektesti.
