Aqmola oblysynda polıtseıler iri kólemde aqsha tonamaq bolǵan uryny ustady
KÓKShETAÝ. QazAqparat - Aqmola oblysynyń polıtseıleri iri kólemde aqsha tonamaq bolǵan urynyń jolyn kesti. Bul týraly oblystyq ІІD baspasóz qyzmetinen habaralady.
Polıtseılerdiń málimeti boıynsha, 1 tamyzda túngi 01:00 mınýt shamasynda Zerendi aýdany Alekseevka aýylynyń 20 jastaǵy turǵyny Kókshetaý qalasyndaǵy páterlerdiń birine tereze arqyly túsken. Kúdikti páter ishinde bolǵan úı ıesiniń inisin qorqytý arqyly 4 myń dollar jáne 2, 4 mln teńge kólemindegi aqshalaı qarajatty jymqyryp áketpek bolady.
Sol kezde páter ishinde osyǵan deıin kúdiktiniń izine túsip, onyń qylmys jasaıtynyn aldyn ala bilgen polıtsııa qyzmetkerleri de boldy. Olar birden kúdiktini qylmys ústinde qolǵa túsirdi.
Kúdikti osyǵan deıin páter urlyǵy boıynsha sottalǵan. Qazirgi kezde, onyń ústinen QR QK 191-baby boıynsha qylmystyq is qozǵalyp, ýaqytsha ustaý oqshaýlaǵyshyna qamaldy.
