Aqmola oblysynda para alǵan TÚKSh bóliminiń basshysy sottaldy
KÓKShETAÝ. QazAqparat - Aqmola oblysy Kókshetaý qalalyq soty aýyr dárejedegi sybaılas jemqorlyq qylmysyn jasady dep aıyptalǵan Býrabaı aýdanynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysyna qatysty qylmystyq isti qarady, dep habarlaıdy "QazAqparat" HAA tilshisi oblystyq sottyń baspasóz qyzmetine silteme jasap.
Sot anyqtaǵandaı, turǵyn úı-kommýnaldyq sharýashylyǵynyń basshysy zańsyz is-áreket jasaǵan. Atap aıtqanda, JShS-niń menedjerinen merdigerlik jumystardy alýyna járdem kórsetkeni úshin 2 000 000 teńge somasynda para alǵan.
"Sot úkimimen turǵyn úı-kommýnaldyq sharýashylyǵynyń basshysy Qazaqstan Respýblıkasy Qylmystyq kodeksiniń 366-babynyń 2-bóligimen (para alý) kináli dep tanylyp, oǵan múlkin tárkileýmen, memlekettik qyzmette laýazymdyq qyzmetterdi atqarý quqyǵynan ómirboıyna aıyra otyryp, jalpy rejımdegi túzeý kolonııasynda óteýmen 3 jyl merzimge bas bostandyǵynan aıyrý jazasy taǵaıyndaldy", dep kórsetilgen habarlamada.
Eske sala keteıik, 2016 jyldyń maýsym aıynda Sybaılas jemqorlyqqa qarsy is-qımyldar ulttyq bıýrosynyń Aqmola oblysy boıynsha departamenti Býrabaı aýdandyq turǵyn úı-kommýnaldyq sharýashylyǵy, jolaýshylar kóligi men avtomobıl joldary bóliminiń basshysy Ə.Elemesovti ustaǵan bolatyn.
Tergeý amaldary barysynda Ə.Elemesovtiń Şýche qalasy avtojoldarynyń boıyndaǵy kógaldandyrý boıynsha sýbmerdigerlik jumystarǵa qol jetkizýge kómek kórsetýi úshin zańdy tulǵadan 2 000 000 teńge kóleminde para alǵany məlim bolǵan edi.
