Aqmola oblysynda para alǵan polıtsııa maıory iri kólemde aıyppul tóleıdi
KÓKShETAÝ. QazAqparat - Aqmola oblysy Kókshetaý qalalyq soty aýyr dárejedegi sybaılas jemqorlyq qylmys jasady dep aıyptaý boıynsha Aqmola oblysy ІІD-niń qylmystyq isti tekserý polıtsııasy basqarmasynyń aǵa jedel ýákiline qatysty qylmystyq isti qarady, habarlady QazAqparat oblystyq sottyń baspasóz qyzmetine silteme jasap.
Sottyń anyqtaýynsha, aǵa jedel ýákil quqyqbuzýshynyń zańsyz is áreketi boıynsha, atap aıtqanda, quqyqbuzýshyny qylmystyq jaýapkershilikten bosatý úshin 80 000 teńge kóleminde para alǵan.
«Sot úkimimen aǵa jedel ýákil Qazaqstan Respýblıkasy Qylmystyq kodeksiniń 366-babynyń 2-bóligimen («Para alý») aıypty dep tanylyp, oǵan múlkin tárkileýmen, polıtsııa maıory ataǵynan aıyrýmen, memlekettik qyzmette laýazymdyq qyzmetin atqarý quqyǵynan ómirboıyna aıyra otyryp, 4 770 000 teńge aıyppul túrinde jaza taǵaıyndaldy», dep kórsetilgen habarlamada.
