Aqmola oblysynda para alǵan basqarma basshysy eki aıǵa qamaýǵa alyndy
KÓKShETAÝ. QazAqparat – Іri kólemde para aldy degen kúdikpen ustalǵan Aqmola oblystyq mádenıet, muraǵattar jáne qujattamalar basqarmasynyń eks-basshysy Kókshetaý qalalyq tergeý sotynyń sanktsııasymen eki aıǵa qamaýǵa alyndy, dep habarlaıdy QazAqparat tilshisi.
«Sheneýnikti 2 aı merzimge qamaýda ustaý túrinde sanktsııa qoldanyldy. Sottyń mundaı sheshim shyǵarýyna eki jaǵdaı sebep boldy. Onyń biri, kúdikti bostandyqqa júrse, tergeýden boı tasalaýy múmkin. Ekinshisi, tergeý sharalaryna kedergi keltirýi, is boıynsha kýágerlerdiń aıǵaqtardy jarııalaýyna yqpal etýi múmkin», - deıdi Aqmola oblystyq sotynyń baspasóz qyzmetindegiler.
Eske sala keteıik, Aqmola oblysynyń jemqorlyqqa qarsy is-qımyl departamenti iri kólemde para aldy degen kúdikpen Aqmola oblystyq mádenıet, muraǵattar jáne qujattamalar basqarmasynyń eks-basshysyna qatysty sotqa deıingi tergeý amaldaryn qolǵa alǵan bolatyn. Sheneýnik «Rýhanı jańǵyrý» baǵdarlamasy sheńberinde qalpyna keltirilip jatqan Aqmola oblystyq ólketaný murjaıyndaǵy jáne M.Ǵabdýllın atyndaǵy murajaıdaǵy kúrdeli jóndeý jumystary oryndalǵandyǵy jónindegi aktige qol qoıǵany úshin kásipkerden birneshe ret para aldy degen kúdikke alynǵan.
