Aqmola oblysynda ótken Prezıdent shyrshasyna 200-den astam bala qatysty
KÓKShETAÝ. QazAqparat - Aqmola oblysynda jyl saıyn uıymdastyrylatyn dástúrli Jańa jyldyq Prezıdent shyrshasy bıyl onlaın formatta ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.
ZOOM platformasy arqyly uıymdastyrylǵan «Ǵajaıypqa toly jańa jyl» jańa jyldyq is-sharaǵa oblystyń barlyq óńirinen 200-ge jýyq oqýshy qatysty. Bul az qamtylǵan jáne kópbalaly otbasylardyń balalary, oqý úzdikteri, túrli jarystar men olımpıada jeńimpazdary. Bilim basqarmasynyń málimetinshe, merekelik baǵdarlamany Aqan seri atyndaǵy joǵary mádenıet kolledjiniń oqytýshylary men stýdentteri usyndy. Ony balalar «Bilim Live Aqmola» Youtube arnasynda kóre aldy.
Sharada aımaq basshysy Ermek Marjyqpaev balalardy Memleket basshysynyń atynan kele jatqan Jańa jylmen quttyqtady.
«Ótip bara jatqan jylda sizder alǵa qoıǵan maqsattaryńyzǵa jetý úshin kóp jumys jasap, eńbekteńdińizder. Buǵan sizderdiń zııatkerlik, shyǵarmashylyq jáne sporttyq sharalarda qol jetkizgen jetistikterińiz aıqyn dálel», - deı kele, aımaq basshysy jas aqmolalyqtar aldaǵy ýaqytta da túrli salalarda joǵary nátıjelerge qol jetkizetinine senim bildirdi.
Prezıdenttik shyrsha-bala ómirindegi eń este qalarlyq jáne mańyzdy oqıǵalardyń biri. Oblystyń ár túkpirindegi daryndy balalar merekeni tamashalaı aldy. Ásirese, teatrlandyrylǵan qoıylym men ertegi keıipkerleri balalardyń kóńilinen shyqty.
Mereke sońynda jergilikti jerlerdegi mektep ókilderi Memleket basshysy Qasym - Jomart Toqaevtyń atynan jańa jyldyq syılyqtar tabys etti. Bul 100 myń teńge aqshalaı sertıfıkattar, táttiler, kórkem kitaptar jáne quttyqtaý ashyq hattary.
